ASNN – Dosti, Papa dhe Tahirllari, të shtrenjtë për bluzinjtë. Bluzinjtë me më shumë të larguar se sa të afruar në kërkim të futbollistëve të lirë Presidenti Bime: “Jo se nuk kemi mundësi financiare, por nuk mund të shpenzojmë shumë”. Në stërvitjen e djeshme të skuadrës gjirokastrite ka qenë prezent edhe presidenti i Luftëtarit, Flamur Bime, i cili në ndryshim me ditët e tjera nuk ka folur me lojtarët, por vetëm me trajnerin Bledar Devolli. Nuk dihet saktësishtë çfarë është biseduar midis tyre, por besohet se janë fokusuar në situatën aktuale në të cilën ndodhet skuadra, sidomos pas largimit të disa lojtarëve.
Dhe aktualisht Luftëtari ka shumë nevoja për ta plotësuar ekipin me futbollistë cilësor. Të ardhurit në këtë fillim viti Papa, Dosti dhe Tahirllari nuk janë parë edhe ditën e djeshme në stërvitje dhe duket se ata janë në kërkim të ekipeve të tjera. Sipas presidentit të Luftëtarit, Flamur Bime, jo se mungojnë mundësitë financiare, por nuk mund të shpenzohet aq sa kërkojnë ata dhe në mungesë të tyre do të kërkohen lojtarë të tjerë. Ditën e djeshme kanë munguar për arsye shëndetësore disa futbollistë, por janë paraqitur në stërvitje për të mos u larguar më Elton Zholi dhe vlonjati Qejvani.
Qejvanin e ka prezantuar vetë presidenti Bime duke e justifikuar për mungesën e deritanishme, por edhe duke e vënë në dijeni se kërkesat që ai ka paraqitur do t’i plotësohen. Çka tregon se kjo garanci që ai ka marrë nga presidenti Bime e ka shtyrë që t’i kthehet stërvitjes me Luftëtarin. Nga tregu i lëvizjeve të futbollistëve në dimër vetëm Braho dhe futbollisti me aftësi të kufizuara Dobro janë afrimet e vetme në ekipin gjirokastrit dhe numri i lojtarëve të larguar është i madh. Ndaj Devollit do t’i kërkohet plotësimi i ekipit me futbollistët e nevojshëm.
Sulejmani, Nelaj dhe Shehaj janë larguar nga vetë drejtuesit e Luftëtarit në përfundim të pjesës së parë të sezonit dhe 5-6 të tjerë janë vetëlarguar duke kërkuar aktivizimin në skuadrat inferior të prefekturës duke mos qënë të sigurt qoftë edhe për të qënë në stolin e Luftëtarit. Sipas bisedës me futbollistët, Dosti, Papa dhe Tahirllari janë në pritje të një përgjigjeje nga drejtuesit e Luftëtarit. Por duket se nuk do të përfundojnë në Gjirokastër pasi vetë presidenti Bime është shprehur se nuk do të bëjë asnjë lëshim.
“E theksoj edhe një herë jo se nuk kemi mundësitë financiare, por nuk mund të shpenzojmë më shumë nga ç’duhet dhe do të gjejmë mundësinë të bëjmë plotësimet e duhura në skuadër me pikësynim që ekipi në fund të fazës së dytë t’i bashkohet ekipeve të kreut të klasifikimit”, – ka përfunduar presidenti i gjirokastritëve dhe njëkohësisht kryebashkiaku i qytetit të gurtë, Flamur Bime.
