ASNN – Trajneri i Luftëtarit, Bledar Devolli, u ka dhënë dorën e fundit përgatitjeve për ndeshjen që do të luhet sot ndaj Pogradecit në Gjirokastër. Kthim i Çaços dhe veçanërisht i Brahos në formacion e bëjnë më të qetë Devollin në ndërtimin e skuadrës. Dhe kjo sidomos pas penalizimit të Mersinit, Frashërit dhe Çunajt. Në stol do të jetë vetë Devolli, i cili tashmë e ka mbaruar dënimin e tij që kishte marrë që nga ndeshja me Sopotin në Peqin vitin e kaluar. Dhe në prag të ndeshjes me Pogradecin, Devolli për gazetat sportive do të deklaronte: “Jemi përgatitur gjatë gjithë javës me idenë që kjo përballje me Pogradecin është shumë e vështirë.”
“Jo vetëm kaq, por e kemi përgatitur këtë takim edhe me idenë tjetër që kjo ndeshje duhet të shërbejë si kthesë në rezultate për ekipin tonë, – ka vijuar ai. – Do të luajmë me formacionin më të mirë dhe nuk ndikohem nga emrat, por në fushë do të jenë ato që do ta meritojnë fanellën dhe që kanë djersitur më shumë në stërvitje. Futbolli nuk bëhet me emra, por me atë çka japin në fushën e lojës. Na duhet patjetër fitorja me Pogradecin, aq më shumë që luajmë në fushën tonë dhe çdo rezultat tjetër na e bën më të vështirë qëndrimin në Kategorinë e Parë. E them këtë sepse sa më shumë afron fundi i kampionatit, aq më shumë bëhen ndeshjet të vështira për t’u fituar.”
“Shpresojmë ende në objektivin tonë dhe kjo arrihet vetëm duke fituar çdo ndeshje, – ka theksuar ish-futbollisti, tashmë trajner i gjirokastritëve. – Kemi mungesën e disa futbollistëve për shkak të kartonëve, por rikuperimi i Dostit dhe i Çaços, apo dhe kthimi i Florian Brahos bëjnë plotësimet e duhura dhe nuk vuajmë në gjetjen e futbollistëve që do të aktivizohen. Pasi midis lojtarëve të skuadrës sonë nuk ka shumë diferencë midis tyre. E rëndësishme është që të japin maksimumin dhe të zbatojnë si duhet detyrat e vënë nga ana jonë dhe ata vetë të preokupohen për fitore dhe të mos bëjnë asnjë nënvlerësim.”
“Jam i bindur se skuadra do të dijë të reagojë për t’i kthyer fitoren qyteti dhe sportdashësve të saj. Kërkoj mbështetjen e tifozërisë duke i garanruar se do të shikojnë një skuadër ndryshe nga ndeshjet e mëparshme, ku edhe pse kemi fituar, nuk kemi bërë paraqitjen e duhur”, – ka përfunduar trajneri i Luftëtarit, Bledar Devolli. Ndërkaq, formacioni i mundshëm i Luftëtarit në përballjen me Pogradecin është: Birja, Dosti, Rexha, Zholi, Brahimi, Duka, Lluka, Çaço, Shenaj, Braho, Tahirllari.
