ASNN – Më në fund Luftëtari ka gjetur fitoren e parë të kampionati pas tre javësh rezultatesh negative dhe për rrjedhojë në kampin bluzi është kthyer buzëqeshja. Takimi ka nisur i shpejtë, pasi djemtë e Bledar Devollit kishin si qëllim fitoren e ndeshjes me çdo kusht. Sepse çdo rezultat tjetër do ta përkeqësonte gjendjen e Luftëtarit.
Madje kjo ndeshje e fituar minimalisht me Bylisin mund të kishte përfunduar dhe më një rezultat më të thellë për bluzinjtë, pasi skuadra jo vetëm që ishte e vendosur mirë në fushë, por dhe ka krijuar raste të pastra për shënim. Mirëpo dhe mbrojtja mike ka qenë e vendosur mirë duke shmangur në shumicën e rasteve rrezikun nga porta e vet.
Për herë të parë këtë sezon, trajneri Devolli ka aktivizuar Shehajn, i cili u tregua një sulmues agresiv. Miqtë nga Ballshi janë munduar që të rrezikojnë me kundërsulm për të dalë me pikë nga Gjirokastra. Megjithatë Luftëtari ia ka dalë të marrë tre pikët e para të sezonit, ndërsa 45 minutat e para të ndeshjes kanë përfunduar me rrjeta të paprekura.
Në pjesën e dytë ka ardhur dhe goli, i cili mban firmën e Frashërit. Pas këtij goli, Luftëtari ushtron presion për një gol të dytë, kërkuar shumë dhe nga sportdashësit. Dhe rasti më i pastër ka qenë i minutës së 66-të, teksa Kaloshi ka shmangur një gjuajtje të fortë të Qejvanit nga rreth 30 metra. Nelaj dhe Erg. Mersini mund të kishin shënuar, por në fund 1-0 për bluzinjtë.

Luftëtari – Bylis 1-0
Shënues: Erlis Frashëri 47’

Luftëtari: Birja, Çunaj, Rexha, Frashëri, Erg. Mersini, Shenaj, Qejvani, End.Mersini, Çaço, Nelaj (Biraçi 88’), L. Shehaj. Trajner: B. Devolli
Bylis: Kaloshi, Gjonbrataj, Aliaj (Dervishi 46’), Bualli, Metaj, Sako, Kuçi, Gega (Prifti 86’), Çaushaj (Mustafaraj 56’), E. Shehaj, Hoxha. Trajner: R. Nenaj
Gjyqtarë: H. Llapra, R. Malaj, E. Pulaj (Vlorë)
Kartonë të verdhë: Frashëri, Shehaj (2) / Gjonbrataj, Bualli, Kuçi, E. Shehaj
Karton i kuq: L.Shehaj