ASNN – Leo Mesi thyen rekordin për numrin më të madh të 3-golëshave që janë shënuar në historinë e kampionatit spanjoll. Nën vështrimin e djalit të tij, Thiago, dhe të dashurës Rokuco, argjentinasi e ndihmoi Barcelonën të fitonte të dielën ndaj Rajo Vajekanos.

Goleada 6-1 që katalanët arritën ndaj modestëve madrilenëve kishte brenda 3 gola nga 4 herë fituesi i “Topit të Artë”. Në këtë mënyrë Barcelona merr kreun e kampionatit spanjoll të futbollit, duke lënë pas rivalen e përjetshme, Realin e Madridit, pasi katalanët tanimë kanë 62 pikë, një më shumë se kryeqytetasit.

Duhet theksuar se skuadra e trajnerit Luis Enrike kthehet në krye të renditjes, për të parën herë nga nëntori i vitit të kaluar. Ndërkaq, 3-golëshi i djeshëm ishte i 24-ti që Mesi shënoi në kampionatin spanjoll dhe i 32-ti në karrierën e tij në gadishullin iberik. I realizuar brenda 11 minutave, ai ishte më i shpejti që ka regjistruar argjentinasi.

Në këtë mënyrë ai shkëputet më shumë nga rivali direkt, Kristiano Ronaldo. Portugezi në këtë aspekt ka mbetur në kuotën e 27 trigolëshave të realizuar. Ndërkohë fituesi në fuqi i “Topit të Artë” e sheh kundërshtarin katalan, ta arrijë edhe në klasifikimin e golashënuesve të sezonit.

Të dy kanë shënuar 60 gola, por që nga dhjetori i 2014-tës, Mesi e ka gjetur rrugën e rrjetës 17 herë, ndërsa Ronaldo vetëm 5 herë.