Sipas relacionit të Ministres së Arsimit dhe Sportit, Lindita Nikolla, qëllimi i ligjit është përmirësimi i politikave për sportin elitar dhe sportin në institucionet arsimore në drejtimin organizativ, teknik dhe funksional, qendror dhe lokal. Krijimin e shanseve të barabarta dhe kushteve për pjesëmarrjen në veprimtari sportive së të gjithë shtetasve shqiptar.

Dhe mbështetur në të drejtat e njeriut, të gjithë kanë të drejtën për të ushtruar veprimtari fizike e sportive duke krijuar infrastrukturën e duhur ligjore, financiare dhe fizike. Jo vetëm kaq, por mundësimi i pavarësisë së plotë të institucioneve sportive që trajtojnë anti-dopingun, dhunën dhe drejtësinë në sport, si dhe rregullimin e marrëdhënieve shtet-institucione sportive.

Sikurse deklarohet ky projektvendim për ligjin e ri të sportit është në përputhje të plotë me programin politik të Këshillit të Ministrave. Në hartimin e kësaj pakete ligjore janë marrë parasysh dhe rekomandimet e Komunitetit Evropian për legjislacionin e sportit në vendet Evropiane, ku roli i shtetit reduktohet në detyrën e  rregullatorit (mbikëqyrës dhe kontrollor).

Dhe efektet e tij, gjithnjë sipas relacionit të ministres Nikolla, do të jenë në rritjen e autonomisë dhe krijimin e mundësive për vetë menaxhim të organizatave sportive kombëtare dhe lokale, nëpërmjet përcaktimit të kompetencave të pushteteve dhe lëvizjes sportive (federata, shoqata dhe klube), me synim rritjen dhe forcimin e demokracisë së brendshme, të organizatave sportive, ndërgjegjësimin dhe disiplinimin në përdorimin e fondeve që ato përfitojnë nga buxheti i shtetit dhe të ardhurat dytësore, në respektim të kritereve të përcaktuara për sportin.