Në ligj, ashtu sikurse është këmbëngulur gjithmonë, është përfshirja për herë të parë të edukimit fizik dhe sportit shkollor në një kapitulli të veçantë, si dhe përcaktimin e kufirit minimal të ngarkesës mësimore të lëndës së edukimit fizik në kurrikulën bërthamë. E kjo që në arsimin parauniversitar.
Madje tashmë do të jetë e parashikuar me ligj dhe organizimi i Federatës së Sportit Shkollor dhe Universitar, që edhe pse ka konflikt me veprimtaritë e Federatave të tjera, përsëri do të jetë në organizim në funksion të institucionalizimit dhe organizmit të veprimtarisë sportive në institucionet arsimore.
Jo vetëm kaq, por i është vënë theksi sportistit elitar, sepse në Ligj do të jetë e ndarë që në përkufizim ndarja e sportit profesionist dhe amator. Për të parën herë në historinë e sportit shqiptar një sportist elitar personifikohet me “STATUS”, i cili përmban në vetvete program zhvillimi, përcaktim kriteresh, mbështetje financiare dhe shpërblim për arritje.
Por ajo që mbetet përsëri në “çengel” është fakti që ende askush nuk përcakton njohjen e viteve të sportit si vite punë në mënyrë që më pas të llogariten në pensionin e pleqërisë. Sepse të gjithë sportistët, pas përfundimit të karrierës sportive, sidomos ato të sporteve individuale, përfundojnë si mos më keq…
Pavarësia e komisioneve nga Shteti
Ndërkohë brenda ligjit tashmë Këshilli i Lartë i Sportit dhe Komisioni i Dhunës nuk do të jenë organizma politik me organikë që vinte me vendim të Këshillit të Ministrave, por një organ i pavarur që do të synojë partneritet më të fortë ndërinstitucional.
Po kështu nuk do të ketë Komision Antidoping, por do të jetë Organizata Kombëtare Antidoping, që përsëri do të jetë një strukturë e pavarur shtetërore, e cila do të ketë misionin kryesor të saj të kryerjes së kontrollit doping për sportistët shqiptarë (brenda dhe jashtë garimit).
Krijimi i kësaj organizate të pavarur, vjen në zbatim të kërkesave të vazhdueshme të Agjencisë Botërore Anti-Doping (WADA) për krijimin e një strukture kombëtare anti-doping krejtësisht të pavarur nga shteti.
