Projektligji për disa ndryshime dhe shtesa në në Ligjin Nr. 9376, datë 21 prill 2005, për Sportin, i cili ka ardhur i plotë në gazetën “Sport Ekspres” të ditës së premte tashmë është bërë objekt debati mes specialistëve të fushës. Sepse për hir të së vërtetës duhet pranuar se janë duke u bërë ndryshime që në fakt nuk është se ndihmojnë zhvillimin e sportit. Përkundrazi shtojnë problemet, pse jo shtojnë pakënaqësitë kur të vijë çështja për shpërblimet financiare tek medaljet e marra në Kampionatin Botëror, Evropian, Lojërat Olimpike dhe Mesdhetare.
E për më tepër i bëjnë lëmsh Federatat Sportive dhe klubet në kompetencat, në veprimet e tyre për shndërrime ashtu siç e kërkon ligji i ekonomisë në privatizim. Dhe ndërkohë që njëri nga hartuesit e Ligjit të Sportit të datës 21 prill 2005, Prof. Asc. Dr Artan Shytaj, që sot është Drejtori i Institutit të Kërkimit Shkencor ka hedhur dritë më shumë pse këto ndryshime kanë vend për rishikim dhe pse nuk duhen kaluar pa u konsultuar dhe një herë. “Ne asokohe, – thotë Shytaj për Sport Ekspres, – e kishim një model për të bërë një Ligj Sporti që do t’i qëndronte kohës.”
“Po sot? Duhet të jenë vetë Federatat të interesuara për t’u ngritur dhe për t’i frenuar këto ndryshime”, – ka shtuar ai. Është thënë në relacionin e Qeverisë në paraqitjen e projektligjit në Parlament se është konsultuar më parë me Federatat Sportive, Komitetin Olimpik Kombëtar Shqiptar, Drejtorinë e Sporteve dhe Ministrinë e Arsimit dhe Sporteve, Institutin e Kërkimit Shkencor dhe Universitetin e Sporteve. Por kur dy nga këto organizma thonë që “nuk na kanë pyetur”, atëherë do të thotë që emrat e tyre në relacion janë përfshirë sa për të thënë që vërtetë ndryshimet në Ligjin e Sportit u konsultuan dhe u bashkëvepruan.
Mirëpo ndryshimet e aktuale, që ndryshe mund të konsiderohen arnime, dhe mosbërja e një ligji rrënjësor për sportin e bëjnë përsëri të ndryshueshëm nga kushdo palë që do të vijë në qeveri. Dhe kur ky ligj, deri më sot ka pësuar ndryshime të pjesshme dy herë, fillimisht më 2007-ën dhe pastaj më 2008-ën, ndryshohet për herë të tretë nuk është më ligj fleksibël për sportin, por sipas interesave të ngushta të atyre që duan të bëjnë politikë me sportin…
