ASNN – Liga “Gjergj Kastrioti” në volejboll, turneu që bashkon ekipet më të mira nga Shqipëria e Kosova, ka ulur thuajse siparin e fazës së grupeve, edhe pse ka mbetur për t’u luajtur vetëm një ndeshje në Grupin A për meshkuj. Për pasojë, thuajse janë përcaktuar të gjitha skuadrat gjysmëfinaliste, që do të luajnë për trofeun e rëndësishëm mbarëkombëtar.

Ndeshjet e fundit në grupe, të luajtura në ditë të ndryshme, kanë dhuruar rezultate interesante. Tek femrat, 3 nga 4 ekipet gjysmëfinaliste për femra janë nga Shqipëria. Skënderbeu dhe Tirana nga Grupi A si dhe Drita e Gjilanit nga Kosova dhe Partizani nga Grupi B, janë ekipet që kanë siguruar një biletë për në gjysmëfinale. Interesante ishte ndeshja mes Tiranës dhe Skënderbeut, e luajtur në kryeqytet, fituar 3-1 nga  bardheblutë.

Ky sukses i dha mundësi Tiranës të kualifikohet për më tej. Mësohet se faza finale e këtij turneu për femra do të zhvillohet në Korçë, më 1-3 mars. Ndërkaq, tek meshkujt, Tirana dhe Peja janë dy skuadrat e kualifikuara nga Grupi B, ku kanë përfunduar të gjitha takimet. Në Grupin A, përveç Partizanit emri i skuadrës së dytë gjysmëfinaliste është ai i Ferizajt, edhe pse pritet të luhet sfida Partizani-Vllaznia, e planifikuar për më 19 shkurt.

Vllaznia nuk është në lojë për biletën për në gjysmëfinale, pasi, edhe sikur ta fitojë ndeshjen e fundit me Partizanin dhe të barazohet me pikë me skuadrën nga Kosova, prapëseprapë nuk arrin të kualifikohet, sepse i ka humbur të dyja ndeshjet përballë Ferizajt. Ende nuk dihet se ku dhe kur do të luhen takimet e fazës finale të këtij turneu të Ligës “Gjergj Kastrioti” për meshkuj, por ka gjasa që ato të luhen në Korçë, ashtu si dhe femrat.

Liga “Gjergj Kastrioti”

Volejboll – Meshkuj

Grupi A

Java e 6-të:

Skënderbeu (Kos) – Ferizaj                        3-1

Partizani – Vllaznia              (19 shkurt 2024)

Renditja

1. Partizani 10 pikë
2. Ferizaj   9 pikë
3. Skënderbeu (Kos)   8 pikë
4. Vllaznia   6 pikë

Grupi B

Java e 6-të:

Peja – Drita e Gjilanit            3-1

Tirana – Erzeni                      3-0

Renditja

1. Tirana 15 pikë
2. Peja 12 pikë
3. Erzeni   6 pikë
4. Drita e Gjilanit   3 pikë

Liga “Gjergj Kastrioti”

Volejboll – Femra

Grupi A

Java e 6-të:

Skënderaj – Prishtina          3-0

Tirana – Skënderbeu           3-1

Renditja

1. Skënderbeu 12 pikë
2. Tirana 12 pikë
3. Skënderaj 11 pikë
4. Prishtina   1 pikë

Grupi B

Java e 6-të:

Drita e Gjilanit – Fushë-Kosova    3-0

Pogradeci – Partizani                       0-3

Renditja

1. Drita e Gjilanit 18 pikë
2. Partizani 10 pikë
3. Fushë-Kosova   7 pikë
4. Pogradeci   1 pikë