Lëkler: “Në Las Vegas rikthehemi te fitorja për t’iu afruar titullit “kampion” për konstruktorë”. Edhe këtë fundjavë, Botërori i Formulës 1 është pushim, për të nisur më pas një fund-sezon të zjarrtë, me 3 gara radhazi. Tek “Ferrari”, pas disa fitoresh radhazi, janë të bindur se fitimi i titullit kampion për konstruktorë është i mundshëm, duke parë diferencën e vogël ndaj “MekLaren”-it në renditje.

I bindur për këtë është piloti nga Montekarlo, Sharl Lëkler, që në prag të garës në Las Vegas, deklaroi: “Kjo është një pistë ku ne duhet të bëjmë mirë. Është fakt që kemi përmirësuar shumë menaxhimin e gomave këtë vit. Duke qenë se të gjithë jemi shumë afër në luftën për fitore, besoj se do të kemi akoma një shans për sukses”.

Më pas 27-vjeçari nga Montekarlo shtoi: “Sezoni është drejt fundit, janë tri gara të njëpasnjëshme, pa pushim dhe gjithçka mund të ndodhë. Nëse e nisim me një rezultat të mirë në Las Vegas, atëherë edhe motivimi për dy garat në Gadishullin Arabik do të jetë më i madh. Ky është objektivi ynë”.