ASNN – Portali i njohur sportiv “Goal” ka përfshirë sulmuesin e Kombëtares kuqezi, Shkëlzen Gashin, ndër 10 futbollistët më të mirë në Amerikë në pozicionin e anësorit të majtë.
Pas përfundimit të sezonit të rregullt, në të cilin u zhvilluan 340 ndeshje, ky portal ka zgjedhur futbollistët më të mirë në secilën pozitë duke përfshirë edhe anëtarin e Kolorado Rapids.
“Shkëlzen Gashi: Me 9 gola, disa prej të cilëve spektakolarë, dhe 4 pasime për gol, Gashi shërbeu si katalizator për sulmin e fuqishëm të Kolorado Rapids”, – shkruan media në fjalë në portretizimin e kosovarit.
“Shqiptari po ashtu krijoi 64 shanse për gol për ekipin e tij”, – vijon më tej përshkrimi për zgjedhjen e Gashit. Ai ishte i katërti më i miri në pozicionin e anësorit të majtë në këtë listë të “Goal”-it.
