ASNN – Shqipëria ka dy portierë cilësorë në kuadratin e saj, që të dy pjesëtarë në Serie A italiane. Etrit Berisha u bë pjesë e Atalantës, me të cilën po luan sezonin e tij të tretë, ndërsa Thomas Strakosha, po në sezonin e tij të tretë, po mban rolin e titullarit tek Lacio. Megjithatë, vëmendja shkon tek Strakosha, i cili është vetëm 23 vjeç, por ka vëmendjen e klubeve më të mëdha evropiane.
Kështu, faqja e njohur italiane, “Fantagazzetta”, (pjesë e rrjetit “Sky Sport”) e ka përzgjedhur Thomas Strakoshën në formacionin më të mirë të datëlindjes 1995, krahas emrave të spikatur si Piatek, Milinkoviç, Romanjoli, etj. Natyrisht, një përzgjedhje e tillë tregon se Strakosha e ka justifikuar vetem tek Lacio dhe për Igli Taren ka qenë një prurje e goditur, sepse ka mbërritur nga Greqia tek Lacio për më pak se 100 mijë euro.
“Strakosha është lindur në Athinë nga prindër shqiptarë edhe është djali i Fotos, portierit legjendar të Kombëtares së Shqipërisë, – shkruan faqja në fjalë, duke përshkruar ecurinë e Strakoshës dhe mbërritjen e tij tek Lacio. – Pra Thomasi ka ndjekur gjurmët e babait të tij, duke kultivuar pasionin për rolin e portierit në fushë. Në të vërtetë ai është zbulim i Igli Tares, drejtorit aktual sportiv, i cili ka meritën që e solli vetë Strakoshën nga Greqia në Itali dhe e bëri pjesë të Lacios në sezonin 2012-2013 .”
“Talenti i tij ka qenë gjithmonë në ngritje, nga viti në vit, duke i zënë vendin veteranit Marketi. Por Strakosha është rritur aq shumë profesionalisht që jo vetëm nuk vë në diskutim rolin e titullarit tek Lacio, por po i merr vendin Etrit Berishës në radhët e përfaqësueses së Shqipërisë”, – përfundon faqja në fjalë, duke bërë kështu një vlerësim të drejtë dhe serioz për “gardianin” kuqezi.
