ASNN – Lajmet e vazhdueshme që mund të largohet nga Napoli, zëvendësimet e shumta, qëndrimi në ndonjë ndeshje në stol dhe preferencat e ndryshme të trajnerit Karlo Ançeloti, kanë bërë që Elseid Hysaj të kalojë momente të vështira dhe këto tensione po reflektohen edhe në lojën e tij, ku ka pasur mjaft gabime.

Kështu, në takimin që Napoli luajti mbrëmjen e të shtunës në Serinë A italiane, kundër Xhenoas, java e 13-të, Hysaj pati mangësi në mbulimin e sulmuesve kryesorë të skuadrës vendase të Xhenoas. Ishte pikërisht shpërqendrimi i Hysajt që solli më pas golin e Xhenoas, një gol që bëri Ançelotin të dalë nga stoli dhe të ulërasë.

Sidoqoftë, trajneri nuk e ndryshoi menjëherë Hysajn, por në pjesën e dytë, pasi ndeshja u barazua 1-1, Ançeloti e hoqi Hysajn  nga fusha në miniutën e 82-të dhe futi në vend të tij një sulmues, prej nga erdhi edhe goli i fitores në një ndeshje, kur fusha ishte thuajse e mbuluar tërësisht nga uji.

Sot mediat italiane e kanë “kryqëzuar” Hysajn, duke e bërë fajtor për golin në një moment ku kishte humbur krejtësisht përqendrimin. “Ka kohë që është i shpërqendruar, – thotë shtypi italian për mbrojtësin tonë kuqezi, –  i mungon kthjellësia në veprime dhe ndaj Xhenoas ishte fajtor në rastin e golit të pësuar. Me këtë paraqitje do ta ketë të vështirë të mbajë rol titullari.”

Shumica e mediave italiane e kanë vlerësuar Hysajn me notën 5.5, së bashku me tre lojtarë të tjerë të skuadrës, të cilësuar mjaft të dobët. Pothuajse në të gjitha mediumet sportive, paraqitja e Hysajt cilësohet e dobët dhe me mangësi sidomos në pësimin e golit. Edhe pse Napoli fitoi, kritikat për një pjesë të grupit, e sidomos Hysajn, kanë qenë të mëdha.