ASNN – Legjionarët e Kombëtares “mësyjnë” Turqinë, pas Muçit në Superligë edhe Arbnor Muja. Pra, nuk është vetëm Ernest Muçi, sepse Turqia është kthyer në tokën e premtuar për shumë futbollistë shqiptarë, dhe në Superligën e këtij vendi do të luajë edhe Arbnor Muja. Lojtari ofensiv “kuqezi” u largua nga kampionët e Belgjikës, Antverpi, duke u bashkuar me Samsunsporin, që luan në elitën turke.
Sipas mediave në Kosovë, kartoni i tij u pagua 2 milionë Euro, ndërsa 1 milionë të tjera mund të jepen nëse realizohen disa objektiva. Muja firmosi kontratë 3.5 vjeçare dhe raportohet se do të fitojë një pagë prej më shumë se 1 milionë euro në vit, shumë më tepër sesa në Belgjikë, ndërsa te Kombëtareja, 25-vjeçari u promovua së fundmi nga trajneri Silvinjo.
Ndërkaq, Ernest Muçi e realizoi të premten kalimin nga Legia e Varshavës tek Beshiktash. Për sulmuesin e ri kuqezi u paguan 10 milionë Euro, më shumë sesa parashikohej si vlerë kartoni, ndërsa ai gjithashtu firmosi për 3.5 vjet në klubin e Stambollit. Mësohet se ai do të paguhet 1.8 milionë Euro në vit nga gjigandja e futbollit turk.
Ndërkaq, në Superligën turke luajnë dy sulmues të tjerë të kombëtares, që janë edhe ndër lojtarët më në formë. Sokol Cikalleshi ka 8 gola e 4 pasime për gol në elitën e futbollit turk për ekipin e tij, Konjasporin, ndërsa Rei Manaj ka 12 gola në kampionat si dhe 4 në Kupën e Turqisë. Ndërkaq, Eduart Rroca, ka ndryshuar skuadër në Ligën e Parë të Turqisë.
Mesfushori shqiptar u huazua nga Istanbulspori tek Manisaspori deri në fund të sezonit, dhe më pas do të shihet se çfarë do të bëhet. Rroca u shpreh i lumtur që do të luajë në një kampionat që e njeh mirë, ndërsa këtë edicion ka luajtur 15 ndeshje në Superligën turke, ku ka shënuar një gol e ka shërbyer për një tjetër, por duke u penguar nga dëmtimet.
