ASNN – Shkëlzen Gashi u aktivizua si zëvendësues në barazimin 2-2 që Bazeli arriti kundër Makabit të Tel Avivit në ndeshjen e parë të “play-off”-it në Ligën e Kampioneve, ndërsa mesfushori i Kombëtares shqiptare, Taulant Xhaka ishte jashtë skuadrës për këtë sfidë. Mesa duket, Gashi duhet të presë ende për golin e parë në këtë edicion të Liës së Kampioneve.
Ai u aktivizua si zëvendësues, por nuk arriti të ndihmojë skuadrën e tij, Bazelin, të shkonte më larg se barazimi 2-2 në fushën e vet ndaj Makabit Tel Avivit, në sfidën e parë të këtij çifti të “play-off”-it të Ligës së Kampioneve. Në fakt, sulmuesi i Kombëtares shqiptare e nisi ndeshjen në stol, ndërsa në minutën e 15-të zëvendësoi Jankon e dëmtuar.
Por Gashi qëndroi larg portës, teksa kampionët zvicerianë shpërdoruan një mundësi të shkëlqyer për të siguruar kualifikimin për në fazën e grupeve. Megjithëse, Makabi kaloi pari në epërsi me Zehavi, vendasit arritën të përmbysnin shifrat. Delgado me 11-metërsh dhe Embolo vetëm dy minuta nga fundi kthyen shifrat në favor të Bazelit. Por festa e zviceranëve mori fund në minutën e 6-të shtesë.
Zehavi vulosi barazimin me golin e dytë personal, duke u dhënë hebrenjve shpresë për kualifikim. Në këtë sfidë, në stol qëndroi Albion Ajeti, ndërsa Taulant Xhaka nuk ishte i grumbulluar. Në ndeshjet e tjera të së mërkurës në “play-off”-in e Ligës së Kampioneve, Valencia dhe Shaktari i Donjeckut i siguruan praktikisht biletat për në fazën e grupeve që në ndeshjen e parë.
Spanjollët mundën 3-1 Monakon, ndërsa ukrainasit fituan 1-0 në vizitën austriake kundër Rapidit të Vienës. Në përballjen tjetër, Sëlltiku i Gllasgout mundi me vështirësi 3-2 suedezët e Malmoes, ndërsa kualfikimi do të vendoset në përballjen e javës së ardhshme.
