ASNN – E përditshmja e njohur britanike, “Daily Mirror”, analizon futbollistin kuqezi. E përditshmja e njohur “Dejli Mirrër”, e ka veçuar Armando Brojën si një nga 12 futbollistët e rinj që mund të spikatin sezonin e ardhshëm me 6 klubet më të mëdha të nivelit më prestigjioz në Angli. Sipas saj, sezoni i ardhshëm mund të jetë sezoni i shpërthimit të Brojës në Premier Ligën Angleze.
Sezoni i ardhshëm mund të jetë sezoni i shpërthimit të Armando Brojës në Premier Ligën Angleze. Kështu shkruan e përditshmja e njohur “Daily Mirror”, e cila e ka veçuar shqiptarin si një nga 12 futbollistët e rinj që mund të spikatin sezonin e ardhshëm me 6 klubet më të mëdha të nivelit më prestigjioz të “topkëmbës” angleze, që janë Mançester Siti, Mançester Junajtid, Arsenali, Liverpuli, Totenhemi dhe Çellsi.
Dhe, duke u ndalur tek kjo e fundit, e përditshmja në fjalë thekson se akademia e të rinjve të klubit londinez është e famshme për cilësinë e talenteve të saj dhe, me retë e zeza që janë mbledhur mbi fatin e bluve për shkak të sanksioneve ndaj pronarit rus, Roman Abramoviç, ata mund të kenë nevojë të mbështeten shumë tek të rinjtë sezonin e ardhshëm.
Duke veçuar 17-vjeçarin Ljuis Holl si një nga të rinjtë premtues, “Daily Mirror” e zhvendos vëmendjen te Armando Broja. “Në një betejë të fortë të huazuarve, së bashku me Konor Gallagerin, sulmuesi shqiptar është një tjetër kandidaturë serioze për t’u kthyer dhe për të luftuar për një vend në skuadër sezonin e ardhshëm”, – shkruan gazeta britanike, e cila më tej vijon: “Por Broja ka një epërsi shtesë, thjesht sepse ai luan në një rol për të cilin Çellsi mund të ketë nevojë të menjëhershme për përforcim.”
“ Mungesa e qëndrueshmërisë nga ana e Romelu Lukakut dhe Timo Vernerit para portës mund të punojë në favor të lojtarit të përfaqësueses së Shqipërisë. Sulmuesi 20-vjeçar ka shënuar 9 gola në 30 ndeshje për Sauthemptonin këtë sezon dhe mund të debutojë lehtësisht në formacionin e Çellsit sezonin e ardhshëm”, – përfundon e përditshmja e njohur “Daily Mirror” analizën e saj për futbollistin e Kombëtares kuqezi, Armando Broja.
