ASNN – 19-vjeçari kuqezi, edhe për 3 vjet të tjera me klubin bardhekaltër të kryeqytetit. Lacio ka rinovuar kontratën me të riun Serxhio Kalaj. Mbrojtësi shqiptar, i datëlindjes së vitit 2000, është thirrur disa herë në grumbullimet e skuadrës së të rriturve, por pa arritur të debutojë në Serinë A. 19-vjeçari është grumbulluar edhe në përfaqësuesen kuqezi të të rriturve, të drejtuar nga trajneri Edi Reja, por në fazën përgatitore paraprake që italiani i Kombëtares zhvilloi në maj.

Lacio vazhdon të jetë e përfshirë në ethet e merkatos dhe tanimë ka nisur edhe përgatitjet për sezonin e ri në kompleksin e saj stërvitor. Ndërkohë, vazhdojnë operacionet e klubit sa u përket largimeve dhe afrimeve dhe një nga lajmet e fundit është se Lacio ka rinovuar kontratën me të riun Serxhio Kalaj. Mbrojtësi shqiptar, i datëlindjes së vitit 2000, është thirrur disa herë në grumbullimet e skuadrës së të rriturve, por pa arritur të debutojë në Serinë A.

19-vjeçari është grumbulluar edhe në përfaqësuesen kuqezi të të rriturve, të drejtuar nga trajneri Edi Reja, por në fazën përgatitore paraprake që italiani i Kombëtares zhvilloi në maj. Rinovimin e kontratës së të riut e ka bërë të ditur e ëma e futbollistit në një postim në profilin e saj në rrjetin social, “Facebook”. Aty ku edhe mësohet se bëhet fjalë për një kontratë 3-vjeçare.

Ndërsa në foton shoqëruese vërehet Kalaj duke vendosur firmën nën shikimin e sekretarit të klubit bardhekaltër të kryeqytetit, Armando Kalveri. Kalaj është aktivizuar edhe me përfaqësuesen e Nën-21-vjeçarëve të Shqipërisë, të drejtuar nga Alban Bushi, në barazim 2-2 të arritur në kuadër të Eliminatoreve të Evropianit të kësaj grupmoshe në Turqi, por edhe në fitoren 2-1 në miqësoren ndaj Uellsit.