Orë vendimtare për të ardhmen e Elseid Hysajt, që vazhdon të jetë një ndër të kërkuarit kryesorë në merkaton e verës për Napolin. Pas blerjes së Mirko Valdifiroit, klubi jugor po këmbëngul për të arritur një marrëveshje me Empolin për Hysajn dhe Saponarën. Mbrojtësi i kombëtares shqiptare prej ditësh po lakohet për një transferim të mundshëm në “San Paolo” edicionin e ardhshëm dhe të dyja klubet janë të gatshme për t’u ulur e për të mbyllur marrëveshjen.

Megjithatë, deri në këto momente palët ende nuk kanë gjetur një akord mes tyre, por orët e ardhshme pritet të jenë vendimtare sa i përket hapit të madh në karrierë të Hysajt. Për futbollistin kuqezi, ka shfaqur simpati të veçantë, trajneri i ri i Napolit Maurizio Sarri, që e ka patur Hysajn njërin prej lojtarëve më të rëndësishëm të tij në kohën kur drejtonte Empolin. Sarri ka patur madje një bisedë dhe me presidentin De Laurentis për këtë çështje dhe gjithashtu dhe për afrimin e mundshëm të Saponarës.

Napoli megjithatë nuk është e vetmja skuadër që interesohet për Elseid Hysajn pasi për të ka një ofertë konkrete dhe nga Gjermania, me Shalke 04-rën që po ndjek me interes çdo lëvizje dhe është e gatshme të përfitojë në rast të ndonjë dyshimi nga ana e Napolit.