ASNN – Mediat italiane zbuluan të martën kërkesën e 22-vjeçarit të Kombëtares, për shkak të mosaktivizimit. Mediat italiane kanë bërë të ditur të martën se mesfushori i Kombëtares së Shqipërisë, Nedim Bajrami, dëshiron të largohet nga Empoli. Bajrami ka humbur vendin e titullarit te skuadra që militon në nivelin më të lartë të kampionatit italian të futbollit, në Serinë A, duke u aktivizuar kryesisht në pjesën e dytë kohëve të fundit.
Kjo ka bërë që 22-vjeçari të shprehë pakënaqësi dhe të kërkojë largimin nga skuadra italiane. Mësohet se Bajrami është i gatshëm të largohet në janar, ndërsa ofertat nuk i mungojnë. Interesim për mesfushorin shqiptar kanë shprehur skuadra nga Bundesliga. Në dy ndeshjet e fundit të Empolit ndaj Sasuolos e Xhenoas, Bajrami nuk u aktivizuar fare në lojë, ndërsa ka një kontratë me klubin e Serisë A deri në vitin 2024.
Në fakt, kjo kërkesë e futbollist vjen në një kohë që ai ka spikatur në ndeshjet e para me Kombëtaren kuqezi, pjesë e së cilës ai u bë pas një beteje të gjatë në FIFA midis Shqipërisë dhe Zvicrës. Bajrami ishte aktivizuar rregullisht për skuadrat përfaqësuese helvete të moshave, por, në fund, me të rriturit, ai zgjodhi fanellën kuqezi. Bajrami është pjesë e Kombëtares që është grumbulluar në Durrës, në përgatitje për dy ndeshjet e fundit të Eliminatoreve të Botërorit “Katar 2022”, ndaj Anglisë dhe ndaj Andorrës.
