ASNN – Ndonëse pritet të bëjë atë hapin e madh dhe të sfidojë seriozisht për kurorën e kampiones, realiteti mbetet ende i mjegullt për skuadrën e Napolit, që ka bërë një tjetër hap fals në Serinë A. Skuadra napolitane nuk fiton dot as me Sasuolon dhe zona e Ligës së Kampioneve është ende larg për Elseid Hysajn. Shkodrani duket se do ta ketë të vështirë të jetë edhe sezonin e ardhshëm në Ligën e Kampionëve.

Kjo pasi skuadra e tij, Napoli, hodhi një tjetër hap të gabuar në kampionat, në një ndeshje ku nuk ishte mirë as ai, e as ekipi i tij. Ndryshe nga sezoni i kaluar, mbrojtësi shkodran nuk duket në formën e tij më të mirë, dhe Napoli mendohet se do ta ketë të vështirë të mbërrijë Ligën e Kampioneve.

Pavarësisht golit shumë të bukur të Insinjes, në “San Paolo” nuk pati fitore, por një tjetër hap të gabuar në Serinë A. Tifozët ishin dëshmitarë të dy rrjetave shumë të bukura, njëra prej të cilave ishte për Sasuolon. Ishte francezi Defrel që shënoi edhe ai me klas, kur kishin mbetur vetëm 8 minuta lojë.

Napolitanët i patën rastet për më shumë se një gol, veçse këtë edicion asgjë nuk po ecën mbarë. Sulmi duket mirë, por loja në mbrojtje nuk jep asnjë garanci, dhe po ashtu edhe Sasuolo mund të kishte realizuar gola të tjerë. Napoli është larg Juventusit, ndërsa ende ka shpresë që mund të mbërrijë në zonën e Ligës së Kampionëve, pra për të zënë një nga 3 vendet e para në kampionat.