ASNN – Milot Rashica do të mungojë 3 javë pas dëmtimit ndaj Ajaksit në kampionatin holandez. Futbollisti 19-vjeçar pritet të jetë gati për ekipin përfaqësueses të Shpresave. Kështu, Rashica nuk do të luajë për 3 javë në kampionatin holandez pas dëmtimit të pësuar fundjavën e kaluar.

Milot Rashica nuk do të jetë në dispozicion të trajnerit të Viteses, Rob Mas, për disa nga ndeshjet e radhës në Superligën e Holandës. Futbollisti me tipare sulmuese u dëmtua në përballjen ndaj Ajaksit në Amsterdam, fundjavën e kaluar, dhe mediat holandeze raportojnë se koha e domosdoshme për riaftësim dhe rikthim në fushë do të jetë pak më e vogël se një muaj.

Mungesa e 19-vjeçarit besohet se do të ndihet për një ekip që synon kualifikimin për në Ligën e Europës sezonin e ardhshëm, dhe kjo sepse Rashica ka shënuar 7 gola dhe ka shërbyer edhe 4 pasime për gol deri tani në kampionat. Gjithsesi më e keqja është shmangur për shqiptarin e Kosovës, sepse kundër Ajaksit ai u dëmtua në një pjesë shumë delikate siç është gjuri.

Futbollisti, që bën pjesë në ekipin kombëtar të 21-vjeçarëve të Shqipërisë, pritet të jetë i gatshëm për trajnerin Redi Jupi, për ndeshjen e radhës në Eliminatoret e Kampionatit Evropian. Shqipëria pret përfaqësuesen e Nën-21-vjeçarëve të Greqisë, në takimin që do të luhet më datë 24 mars 2016 në Stadiumin “Elbasan Arena”.