ASNN – Ledian Memushaj është një lider i vërtetë te Peskara. Kapiteni ishte më i miri në fushë në triumfin 2-1 ndaj Lançianos, në derbin e Abrucos. Memushaj realizoi golin e dytë në këtë triumf të rëndësishëm, që e mban ekipin e trajnerit Masimo Odo në zonën e “play-off”-it.
Mesfushori i Kombëtares ishte i pagabueshëm nga pika e 11-metërshit. Ai pati edhe mundësi të tjera shënimi duke qenë një rrezik i përhershëm për portën e Lançianos. Ledian Memushaj ka shënuar deri më tani 5 gola në këtë kampionat. Ndërkohë, ka patur dje një rikthim për Mërgim Mavrajn me ekipin e parë të Këlnit në Gjermani.
Mbrojtësi shqiptari hyri në fushë në kohën shtesë në takimin me Borusian e Dortmundit. Kjo ishte ndeshja e tij e 100-të në Bundesligën gjermane. Aktivizimi i Mavrajt do t’i shërbejë atij për të arritur formën e duhur për fazën finale të “Euro 2016”-ës, pasi është një nga titullarët kryesorë të Kombëtares kuqezi.
