ASNN – Mbrëmjen e së hënës, në kuadër të javës së 34-t të Serisë A, Napoli priti Atalantën, në një duel të bukur e me rivalitet të fortë, ku fitoi skuadra nga Bergamo 2-1. Në fushë zbritën titullarë dy lojtarë të Kombëtares kuqezi, që të dy mbrojtës, njëri me Napolin dhe tjetri me Atalantën, i pari Elseid Hysaj e tjetri Berat Gjimshiti. Kurse portieri Etrit Berisha qëndroi gjatë gjithë kohës në stol, pasi në fushë titullar ishte rivali i tij tek Atalanta, Pjerluigji Golini.
Ishte një fitore e madhe e Atalantës pasi tani lakmon vendin e 4-t në renditje, një pozicion që i jep mundësinë asaj të luajë edicionin tjetër në Ligën e Kampioneve. Në këtë ndeshje shkëlqeu si askush tjetër mbrojtësi Berat Gjimshiti, i cili mori notën më të lartë nga mediat sportive italiane, duke qenë pengesë e pakalueshme për sulmuesit e Napolit. Madje vetë mediat italiane e kanë përshkruar paraqitjen e tij mbresëlënëse dhe njëherësh, me ndikim të fortë në 3-pikëshin e marrë në Stadiumin “San Paolo” të Napolit.
Referuar faqes në Internet, “bergamonews.it”, mbrojtësi i përfaqësueses shqiptare ishte padyshim më i miri në fushë në fitoren e Atalantës. “Gjimshiti meriton notën 7. Është i jashtëzakonshëm në mbylljen që i bën Mertens. Milik merr minimumin nga kjo ndeshje për shkak të Gjimshitit, i cili ishte mbrojtësi më i mirë në fushë”, shkruan faqja në fjalë në vlerësimin e bërë për Berat Gjimshitin. Kjo paraqitje është një sinjal i mirë edhe për trajnerin Edi Reja, i cili po vrojton në distancë lojtarët e Kombëtares në kuadër të ndeshjeve të qershorit ndaj Islandës dhe Moldavisë.
