ASNN – “Eksperti” Memushaj i prirur për sherre me trajnerët, por është kampion në Serie B për pasime të sakta. Mesfushori i Kombëtares kuqezi, Ledian Memushaj, u rikthye në fillim të këtij sezoni në Serie B, pas një përvoje jo dhe aq produktive me Beneventon në Serie A. Në kategorinë e dytë italiane ai u rikthye në gjirin e Peskarës, skuadër me të cilën ka njohur suksese të rëndësishme dhe ka luajtur vitet më të frytshme të karrierës së tij.
Dhe menjëherë sapo është kthyer ka marrë rolin e liderit, duke qenë një nga më të vlerësuarit e kësaj skuadre. Mediat italiane e cilësojnë Memushajn “mbret” të pasimeve të sakta në Serinë B, madje nga statistikat, me 5 pasime për gol, por edhe raste të krijuara, Memushaj mban rekordin aktualisht në këtë nivel të futbollit italian. Nga ana tjetër, vetë vlonjati ka rrëfyer në mediat italiane se ka raport të vështirë me trajnerët e me njërin madje ka bërë dhe sherr.
Pikërisht me De Zerbin, me të cilin nuk ka folur më pas për disa muaj. “Unë e kuptova që në fillim se më mungonte Peskara, – u ka zbuluar Ledian Memushaj, duke folur për mediat sportive italiane, – sepse te Benevento më donte Baroni, por jo dhe aq Zemani. Më vonë pata përplasje me De Zerbin, të cilit i kërkova troç të më qartësonte nëse isha në planet e tij. Në fillim më tha “po, sigurisht”, por pastaj nuk folëm për 3 muaj me njëri-tjetrin.”
Memushaj ka qenë gjatë gjithë këtyre viteve pjesë e Kombëtares, duke pasur një rol të madh sidomos në Eliminatoret dhe pjesëmarrjen historike të Shqipërisë në fazën finale te Evropianit të Francës në vitin 2016. Edhe aktualisht ai është pjesë e skuadrës kuqezi nën drejtimin e trajnerit Kristian Panuçi dhe nuk e ka humbur aspak sharmin e lojës së tij plot fantazi dhe forcë në mesfushë.
