ASNN – “Qari i njërit, qederi i tjetrit”. Kjo shprehje e vjetër popullore vlen në rastin e portës së Atalantës në Serinë A të Kampionatit Italian të Futbollit. Portieri i Kombëtares shqiptare, Etrit Berisha është gati dhe do të rikthehet titullar këtë fundjavë në portën e zikaltërve, pas dëmtimit që e mbajti jashtë disa javë. E përditshmja e mirënjohur sportive italiane, “Gazzetta Dello Sport”, e cilëson rikuperimin e shqiptarit si një lajm të keq për Sportielon, i cili e ka tashmë të pashmangshme që t’i japë lamtumirën me numrit një të portës bergamaske.
Edhe pse momentalisht në huazim, Berisha pritet të nënshkruajë përfundimisht për Atalantën në fund të sezonit dhe është pikërisht skuadra e Lacios që synon të afrojë gardianin italian në këmbim të numrit 1 të portës kuqezi, kartonin e të cilit aktualisht e zotërojnë po bardhekaltërit e kryeqytetit. Sipas të përditshmes sportive italiane në fjalë, vlera e vendosur fillimisht nga Lacio prej 6 milionë eurosh ishte një “mur i pakalueshëm” për klubin bergamask. Por, futja e Sportiellos në lojë mund ta zhbllokojë përfundimisht situatën.
Berisha është aktivizuar titullar në 10 ndeshje gjatë këtij sezoni me Atalantën, e cila, me atë në portë, ka arritur të korrë 7 fitore, të marrë 1 barazim dhe të pësojë vetëm dy humbje, ndërsa prania e tij këtë të diel në portën bergamaske do të jetë ndeshja e 11-të si titullar, pasi trajneri Gasperini beson verbërisht në aftësitë e portierit të lindur në Prishtinë, i cili pas disa sezoneve në Itali ka arritur të tërheqë vëmendjen për shkak të paraqitjeve të tij pozitive me skuadrën zikaltër.
