ASNN – Qaka rikthehet në “skenë”, presidenti i Iasi Politekhnika flet për oferta të shumta. Mesfushori i Kombëtares kuqezi, Kamer Qaka, u largua nga Dinamo e Bukureshtit dhe u bë sërish pjesë e klubit të Iasi Politekhnika në kampionatin elitar të Rumanisë. Djaloshi shqiptar ka nisur të luajë javët e fundit rregullisht dhe ka bërë prezantime mjaft të mira. Falë këtyre paraqitjeve, ai është kthyer dhe një herë në skenë si një prej futbollistëve më të kërkuar.
Madje është vetë presidenti i kliubit të Iasit, Adrian Ambrosie, i cili tha se për Qakën interesimet nuk mungojnë, por ai shtoi se nuk ka ofertë konkrete në termat financiare dhe një lëvizje të mundshme për së shpejti. Duke folur për median sportive vendase, “ProSport”, ai ka pranuar se në drejtim të tij, ka pasur disa oferta nga klube të rëndësishme, por… “Nuk ka ardhur ende një ofertë konkrete dhe zyrtare në klubin tonë”, – u shpreh Ambrosie.
“Por unë mund të them se çdo futbollist mund të shitet në çdo kohë, – ka vijuar kreu i klubit rumun. – Ka pasur disa interesime për Qakën, Flores dhe Pantiru. Nuk mund t’i bëj me dije emrat e skuadrave, por mund të them se janë klube të rëndësishme.” Kamer Qaka nuk ishte ftuar në ekipin kombëtar të Shqipërisë në ndeshjet e fundit, madje as në ato të shtatorit e tetorit dhe kjo lidhej me dëmtimin që ai pësoi dhe mungesën e aktivizimit.
Ai nuk është ftuar në Kombëtare që nga miqësoret me Kosovën dhe Ukrainën në fund të majit e në fillim të qershorit të këtij viti. Por minutat në rritje, si dhe prezantimet cilësore në fushë me Iasi Politehknika në Rumani, mund ta ndihmojnë fantazistin e mesfushës të rikthehet në ekipin përfaqësues të trajnerit Kristian Panuçi.
