ASNN – Futbollisti i Kombëtares kuqezi, Elseid Hysaj, debutoi të dielën me skuadrën e tij të re, Napolin, skuadër e cila pagoi 5 milionë euro për ta blerë mbrojtësin e kombëtares shqiptare nga Empoli. 21-vjeçari u aktivizua në pjesën e dytë të miqësores ndaj francezëve të Nisës. Pavarsisht humbjes së skuadrës së tij në shifrat 2-3, paraqitja e Hysajt në këtë miqësore ishte e kënaqshme.
Ndonëse shkodrani ka zhvilluar vetëm disa seanca stërvitore me Napolin dhe i duhet më shumë kohë për t’u përshtatur me skuadrën e tij të re, ai ka spikatur me lojën e tij rigoroze në të majtë të mbrojtjes. Dy ditë më parë, mbrojtësi pati kryer testet mjekësore me skuadrën e trajnerit Sarrit dhe u bë zyrtarisht përforcimi i pestë për të në ekip. Kështu, ky është një lajm pozitiv për të ardhmen e futbollistit shqiptar dhe për Kombëtaren shqiptare, që do të ketë një futbollist që është pjesë e Napolit në Serinë A.
Mbrojtësi i Kombëtares kuqezi ka hedhur firmën mbi kontratë, teksa për 5 vitet e ardhshme do të jetë pjesë e skuadrës napolitane. Sipas asaj që raportojnë mediat italiane, mes lojtarit dhe klubit është zgjidhur edhe çështja e të drejtave të imazhit. Hysaj ka hequr dorë nga kompania e veshjeve që e sponsorizonte dhe në këtë mënyrë ka nënshkruar zyrtarisht me Napolin.
Pas largimit nga Empoli, 21-vjeçari rigjen te Napoli trajnerin Mauricio Sarri. Transferimi i Hysajt i kushtoi klubit të presidentit De Luarentis plot 5 milionë euro. Mësohet se mbrojtësi do të për fitojë 600 mijë euro në vit, pa përfshirë këtu bonuset e parashikuara në kontratë për objektivat e klubit. Tashmë Hysaj duhet të luftojë shumë për të fituar vendin e titullarit, në ndryshim nga Empoli, ku ishte i padiskutueshëm.
Ndërkaq, trajneri i Kombëtares shqiptare, Xhovani De Biazi, ka folur për mediat italiane menjëherë pas zyrtarizimit të transferimit të Hysajt. “Mendoj se Napoli ka bërë një blerje të madhe, – ka thë ai. – Hysajn e kam njohur në ekipin kombëtar, rreth dy vjet më parë. Bëhet fjalë për një lojtar me cilësi të shkëlqyera dhe me shumë personalitet në fushë. Unë siguroj tifozët e Napolit se klubi i tyre ka bërë një blerje të madhe.”