ASNN – Ai ishte një nga lojtarët më interesantë të brezit të tij, duke shijuar, por edhe spikatur, me raste, edhe me fanellën e Kombëtares kuqezi kur i është dhënë mundësia. Por karriera e tij ka patur një shtrirje të admirueshme gjeografike, duke e çuar nga Tirana, në Zvicër, në kontinentin amerikanoverior, në SHBA, e së fundmi në Lindjen e Mesme. Jahmir Hyka për momentin ndihet i lumtur në Izrael që edhe është edhe ndalesa e tij e radhës në karrierën e gjatë që ka patur deri tani.
Që prej shkurtit të këtij viti, pas përvojës me Makabin e Netanjas, 32-vjeçari shqiptar është bërë pjesë e Sektzia Nes Tziona, aty ku është shok skuadre me bashkëlojtarin kuqezi, Sabien Lilajn. Megjithatë, në një intervistë dhënë për “Player on Focus”, Hyka nuk i harron fillimet e tij, teksa ka dalë si futbollist nga Tirana dhe një ditë dëshiron të rikthehet te bardheblutë. “Synimi im është të vazhdoj të luaj jashtë Shqipërisë edhe për disa kohë”, – ka thënë ai.
“Me Tiranën kam pasur dhe kam marrëdhënie shumë të mira, kështu që nëse unë do të vendos një ditë të rikthehem në Shqipëri, besoj se do të jetë ekipi i parë me të cilin do të bisedoj, – vijoi Hyka. – Pra, në Shqipëri mund të kthehem për Tiranën, tani dua të vazhdoj të luaj jashtë. Në futboll nuk mund të bësh plane, aq më tepër me këtë situatën e krijuar tani, por shpresoj të jemi mirë me shëndet në radhë të parë dhe të mos kemi dëmtime.”
“Kam dëshirë që të luaj futboll sa më gjatë që të jetë e mundur, – ka vijuar mesfushori shtatshkurtër. – Kam edhe një këshillë për lojtarët e rinj. Ndonjëherë talenti nuk mjafton që të bëhesh një lojtar i mirë duhet shumë punë, sakrificë dhe vullnet për të arritur atë që doni. Prandaj ata duhet të punojnë shumë dhe të mos mjaftohen vetëm me talentin.” Jahmir Hyka është aktivizuar me Kombëtaren e Nën-17, Nën-19 dhe Nën-21-vjeçarëve të Shqipërisë, për të luajtur më pas 47 ndeshje e për të shënuar dy gola me atë të të rriturve.
