Pak ditë më parë u bë fakt i kryer largimi i tij nga Hapoeli i Haifas, por mesa duket e ardhmja e Hamdi Salihit do të vazhdojë të jetë Izraeli. Një lajm të tillë e bëri të ditur faqja sportive izraelite në Internet, “Sport5.co.il”, i cili nënvizon faktin se presidenti i Hapoelit të Haifas, Joav Katz, i ka ofruar një kontratë të re 2-vjeçare, Salihit, që sipas të gjitha gjasave sulmuesi shqiptar nuk do të hezitojë ta firmosë.
Këtë të martë, klubi izraelit zyrtarizoi rinovimin e kontratës edhe për një tjetër sezon me trajnerin Tal Banin dhe kërkesa e parë që u ka bërë ky i fundit drejtuesve është të mbajnë në skuadër Salihin. Golashënuesi shkodran, i cili u transferua te Hapoeli i Haifas në janar të këtij viti, në 10 ndeshje me këtë skuadër realizoi 4 gola shumë të rëndësishëm që i mundësuan Hapoel Haifas qëndrimin në elitën e futbollit izraelit edhe për një tjetër sezon.
Nga marrëveshja e re 31-vjeçari pritet të përfitojë një pagë më të lartë. Edhe pse bëri të ditur përfundimin e kontratës me Hapoelin e Haifas disa ditë më parë, Hamdi Salihi theksoi se e ardhmja e tij do të vazhdojë të jetë në kampionatin izraelit, por sipas asaj që raporton “Sport5.co.il” me shumë mundësi ish-sulmuesi i Vllaznisë dhe Tiranës nuk pritet të ndërrojë skuadër duke vijuar aventurën e tij me Hapoelin e Haifas.
Në një sezon e gjysmë në Premier Ligën Izraelite, fillimisht me Hapoelin e Akrës dhe, më pas, me Hapoelin e Haifas, Hamdi Salihi ka realizuar gjithsej 19 gola duke rezultuar një nga sulmuesit më efikasë të kampionatit.
