ASNN – Fundjava kuqezi, Asllani vendimtar me pasim goli. Në kampionatin turk shkëlqejnë Manaj dhe Cikalleshi. Edhe këtë javë fundjavë shumica e futbollistëve të Kombëtares shqiptare, të cilët aktivizohen me klube të ndryshme në Evropë kanë luajtur minutat e tyre me ekipet përkatëse, duke qenë edhe protagonistë. Kështu, Kristjan Asllani e nisi si titullar me Interin sfidën e kampionatit ndaj Fiorentinës dhe menjëherë ishte vendimtar me pasimin e dhënë për golin e fitores, të shënuar nga Lautaro Martinez.
Mesfushori kuqezi e luajti të gjithë ndeshjen dhe zhvilloi një paraqitje shumë të mirë në fushën e lojës. Faqja e specializuar për statistika “SofaScore” e vlerësoi Kristjan Asllanin me notën 7.3, e treta më e mirë te Interi. Edhe Sokol Cikalleshi dhuroi dy pasime për gol në sfidën e skuadrës së tij, Konjasporin, me Istanbul Bashakshehirin. Sulmuesi kuqezi në pjesën e parë pasoi dy herë për shokun e skuadrës Prip, që realizoi dy gola. Megjithatë Konjaspori nuk mundi ta shmangte humbjen pasi në pjesën e dytë miqtë realizuan 3 gola dhe fituan ndeshjen.
Ndërkaq, Rei Manaj nuk ndalet dhe gjen sërish rrugën e rrjetës. Sulmuesi kuqezi realizoi një gol shumë të bukur dhe vendimtar në sfidën Sivaspor-Beshiktash, që përfundoi 1-0. Sivaspori regjistroi një tjetër triumf, falë Rei Manajt, që shkon në kuotën e 11 golave në kampionatin turk. Manaj e luajti të gjithë sfidën dhe në fund u vlerësua si lojtari i ndeshjes me notën 8.0 nga faqja e specializuar për statistika “SofaScore”. Tituallarë me skuadrat e tyre u aktivizuan edhe Elhan Kastrati, Ivan Balliu, Berat Gjimshiti, Adrian Ismajli, Ylber Ramadani, Klaus Gjasula dhe Arbnor Muja, ndërsa Keidi Bare dha kontributin e tij si zëvendësues.
