ASNN – Duket e tepruar, por në fakt është realitet. Elseid Hysaj është një nga mbrojtësit më të shtrenjtë në botë. Vlerësimet e fundit e çmojnë shkodranin 51.3 milionë Euro. Është Observatori i Futbollit Europian (CIES), në përditësimet e tij të fundit, që ka bërë një listë të lojtarëve më të shtrenjtë në botë për 5 kampionatet elitare evropiane.
Ata kanë zgjedhur 10 lojtarët më të shtrenjtë për çdo repart dhe në mbrojtjen e krahut të djathtë, është klasifikuar në vend të 7-të edhe Elseid Hysaj. Kartoni i mbrojtësit të përfaqësueses së Shqipërisë, i cili është pjesë e Napolit prej disa vitesh, vlerësohet me 51 milionë e 300 mijë Euro.
Ai lë kështu pas Hektor Belerinin e Arsenalit, Lukas Hernandezin e Atletikos së Madridit dhe Alvaro Odriozolan e Realit të Madridit. Interesimi nga klube elitare angleze si Çellsi e Mançester Junajtid, apo Atletiko e Madridit në Spanjë dhe Bajerni i Mynihut në Gjermani, tregojnë se Hysaj është realisht një nga lojtarët më të vlerësuar në Evropë në rolin e krahut të djathtë të mbrojtjes.
