ASNN – Merr fund pritja, Sokol Cikalleshi kalon tek Akhisarspor në Superligën e Turqisë. Sulmuesi i Kombëtares kuqezi, Sokol Cikalleshi, i ka dhënë drejtim karrierës së tij, pasi, pas ndërprerjes së marrëdhënieve me ekipin e Gëztepesë, nuk preferoi ta vazhdojë kontratën me skuadrën e Osmanllësporit që kishte kartonin e lojtarit, por iu ngjit ish-ekipit të tij, Akhisarsporit, klub me të cilin Cikallleshin e lidhin shumë gjëra. Sqarimet e nevojshme për kontratën e re dhe marrëveshjen e arritur me të dy klubet në bisedime, i ka bërë vetë sulmuesi kavajas.
i cili beson se me një kontratë 3.5 vjet tek Akhisarspor do të ketë mundësinë të tregojë vlerat e tij. Nga ana tjetër, nëse arrin të luajë titullar, Cikalleshi do të marrë patjetër ftesë nga trajneri Kristian Panuçi. “Unë tashmë nuk jam më pjesë e klubit Goztepe! – shkruhet në një postim të Sokol Cikalleshit në profilin e tij në rrjetin social, “Facebook”. – Unë dhe menaxheri im vendosëm të shkëpusim marrëdhëniet profesionale me mirëkuptim me klubin për 2 arsye: E para: Pasi hapësirat e mia për të luajtur ishin te pakta dhe për shume arsye kjo vazhdoi shumë gjatë!”
“E dyta: U hap drita jeshile për të lëvizur tek cilido klub në Superligë në merkaton e janarit! – vijon ai. – Faleminderit Goztepe për bashkëpunimin edhe pse të shkurtër që kaluam bashkë! Që nga sot me shumë lumturi bëj me dije që mes 3 ofertave që kisha zgjodha ekipin ku ndjehem si në shtëpi që më hapi dyert pa hezitim për të më bërë pjesë të tyrin, Akhisarspor! Presidenti i ekipit bleu përfundimisht kartonin tim nga klubi Osmanlispor dhe bashkë firmosëm një kontratë 3,5 vite! Falënderoj klubin Osmanlispor për gjetjen e gjuhës së përbashkët dhe i uroj suksese të mëtejshme!”
“Jam shumë i uritur për të luajtur dhe po pres me padurim të zbres në fushë për ekipin tim të ri!”, – përfundon Cikalleshi postimin në profilin e tij në rrjetin social “Facebook”.
