ASNN – E enjtja ka qenë një ditë e mbushur me emocione të përziera për 3 futbollistë shqiptarë që militojnë në skuadrat e huaja dhe që marrin pjesë në veprimtarinë e dytë të futbollit kontinental të klubeve, në Ligën e Evropës. Kështu, portieri Etrit Berisha dhe mesfushori Kamer Qaka janë kualifikuar për më tej, pasi skuadrat e tyre, Atalanta dhe Steauaja e Bukureshtit, kanë triumfuar bindshëm, përkatësisht ndaj Sarajevës dhe Rudar Velenjes.
Në fakt, skuadra e gardianit shqiptar, e cila erdhi në kryeqytin boshnjak pas barazimi 2-2 në ndeshjen e parë në shtëpi, ka vijuar ta shpartallojë Sarajevën vendase, duke fituar me rezultatin e thellë 8-0, me 5 gola të shënuar në 45 minutat e para dhe 3 në të dytat. Në turin e 3-të, skuadra e Atalantës, do të përballet me Hapoelin e Haifas, me ndeshjen e parë që do të luhet në Itali më 9 gusht 2018 dhe atë të kthimit në Izrael një javë më pas.
Ka patur minuta edhe për Qakën në fitoren 4-0 të Steauasë ndaj sllovenëve të Rudarit, teksa edhe ndeshjen e parë rumunët e kishin fituar 2-0 në fushë të huaj. 23-vjeçari ka hyrë në fushë në minutën e 59-të, teksa Steauaja kryesonte 2-0. Rumunët do të ndeshen me Hajdukun e Splitit në turin tjetër. Ndërkohë, skuadra e Elis Bakajt, Shahtjori i Soligorskit, e ka çuar në shtesë sfidën me Leh Poznanin, pasi të dy 90-minutëshat ishin mbyllur me të njëjtjat shifra 1-1.
Por aty është mundur me dy gola të pësuar në minutat 94 dhe 118. Bakaj është zëvendësuar në minutën e 64-t nga Laptev, i cili vijoi të shënonte golin e barazimit të përkohshëm.
