ASNN – Kanë mbetur vetëm pak javë nga fillimi i sezonit të Kategorisë së Parë dhe kushtet në stadiumin “Liri Ballabani” të qytetit Burrelit janë kritike, raporton e përditshmja më e vjetër sportive shqiptare në treg, “Sport Ekspres”. Për të disatën herë trajneri Vladimir Gjoni e ka ngritur shqetësimin e gjendjes së rënduar të stadiumit, aneksit dhe dhomave të zhveshjes. Gjatë një vëzhgimi në mjediset e brendshme të stadiumit përballesh me kushtet mesjetare të dhomave të zhveshjes së futbollistëve, gjyqtarëve dhe dusheve.
Prej shumë muajsh nuk është vënë dorë nga pushteti lokal, ndërkohë që gjendja ka ardhur duke u përkeqësuar nga muaji në muaj. Edhe vitin e kaluar janë kryer investime, por amortizimi i taracës së tribunës VIP dhe lagështira e madhe kanë bërë që muret dhe tavanet e dhomave të zhveshjes të kenë probleme serioze, vijon gazeta në fjalë. Trajneri Gjoni me të drejtë ka kërkuar ndërhyrjen e Bashkisë së Matit për të ndryshuar gjendjen. Jo vetëm dhomat e zhveshjes dhe dushet e ekipit vendas janë në këtë situatë. Edhe dhomat e zhveshjes dhe dushet e ekipi mik janë në gjendje kritike.
Disa ditë më parë mjediset e “Liri Ballabanit” janë inspektuar nga kryetari i Bashkisë Mat, Nezir Rizvani, por ai nuk ka dhënë sqarime në se pushteti lokal do të investojë për ndryshimin e gjendjes, por ka pranuar se situata është problematike. Dje, zyrtarë të policisë lokale dhe të FSHF-së kanë inspektuar stadiumin e Burrelit dhe pas vëzhgimit të kryer janë shprehur se kushtet në këtë stadium janë përkeqësuar dhe se Bashkia e Matit duhet të kryejë investime për rrethimin e jashtëm, të brendshëm, shkallët e stadiumit, tribunën VIP dhe sidomos në mjediset e brendshme të tij, në dhomat e zhveshjes, dushe, tualete, etj.
Ajo që duhet theksuar, është se fusha e Burrelit,është vetëm njëra nga fushat apo stadiumet e niveleve inferiore të Kampionatit Kombëtar të Futbollit që i kanë mjediset sportive në këtë “derexhe”.
