Të rinjtë e 8 shkollave të mesme, plotësisht me nismën e tyre dhe aspak të shtyrë nga organizma të tjerë, janë bërë bashkë në veprimtarinë sportive, Kupa “Rinia”, e cila ka nisur dje në fushat e shkollës profesionale “Harry Fultz”. Me mbështetjen e mësuesit të fizkulturës së kësaj shkolle, Ilir Gusho, që është njëkohësisht anëtari i Komitetit Drejtues të Komitetit Olimpik Kombëtar Shqiptar e paralelisht dhe Kryetari i Komisionit të Sportit për të gjithë në këtë institucion të olimpizmit shqiptar, por dhe të Petrit Dobit, kjo veprimtari ka ngritur siparin dje në mesditë.

Në këtë veprimtari marrin pjesë 8 shkolla, që janë “Harry Fultz”, Partizani, Besnik Sykja, Arben Broci, Andon Zako Çajupi, Shkolla e Mesme Teknike-Ekonomike, Qemal Stafa dhe Aleks Buda. Veprimtaria ka moton “Edukim – Orientim – Vetëveprim”, të cilat të tria bashkë shpresohet të jenë dhe adrenalina e rinisë shkollore. Në ditën e hapjes ka përshëndetur dhe drejtoresha e shkollës “Harry Fultz”, Brikena Baxhaku, ndërsa ndeshjet e futbollit do të zhvillohen në fushën e kësaj shkolle të mesme profesionale, basketbolli tek shkolla e mesme “Qemal Stafa” dhe volejbolli tek “Arben Broci”.

Një fjalë e mirë duhen thënë për të gjithë mësuesit e fizkulturës së këtyre shkollave, në mënyrë të veçantë ata që kanë kontribut me rezultate e trofe në disiplinat sportive. E kjo duke nisur që nga Genci Misha, Elton Tukseferi, Denis Agaraj, Indrid Zhuli, Valbona Laukaj, Alma Osmani etj. Pa harruar këtu dhe grupin organizator të kësaj veprimtarie që janë Etjen Beleshi, Kevin Kosova, Renaldo Zenuni, Enejd Kodra, Ana Maria Mëhilli. Ndërkohë ndeshja e basketbollit është gjykuar nga gjyqtari i kategorisë së parë, Erlambi Tiko, sikurse dhe gjyqtarët të tjerë.

E duke qenë se kjo veprimtari është krejtësisht nismë e këtyre nxënësve dhe mësuesve të edukimit fizik, të cilët veprojnë edhe kur Bashkitë, apo Drejtoritë Arsimore kanë harruar prej kohësh kampionatet e shkollave të mesme, atëherë u duhet thënë “Bravo”. Pa thënë që e meritojnë dhe një urim, që shkon për të gjithë mësuesit e Shqipërisë, “Gëzuar 7 Marsin…”.

Kupa “Rinia 2017”

Rezultatet e ditës së parë:

Futboll:

Harry Fultz – Arben Broci                2-2

(Me 11-metërsha fiton Harry Fultzi 4-2)

Basketboll – Djem:

Harry Fultzi – Besnik Sykja             45-21

Volejboll – Femra:

Besnik Sykja – Çajupi                      2-1