ASNN – “Djajtë e Kuq” triumfojnë 1-0 në sfidën e kthimit të gjysmëfinaleve,por në finale shkon Man. Siti. Transmetimet ekskluzive të veprimtarive madhore sportive vijojnë në Rrjetin e Radio-Televizionit Shqiptar dhe Kupa e Ligës Angleze ka luajtur të mërkurën takimin e kthimit të gjysmëfinales, derbin e Mançesterit, midis Sitit dhe Junajtid, që u fitua nga miqtë 1-0.
Ashtu sikundër ndeshja e parë, që luajt më 7 janar, edhe ndeshja e kthimit, u soll për sportdashësit drejtpërdrejt në kanalin RTSH Sport. Derbi i Mançesterit, midis Sitit dhe Junajtid, i vlefshëm për gjysmëfinalet e Kupës së Ligës Angleze, ka luajtur të mërkurën aktin e dytë. Akti i parë, i luajtur në fillim të janarit në “Olld Trafford” ishte fituar nga 3-1 skuadra e trajnerit Pep Guardiola.
Dhe “Djajtë e kuq” u përballën me një mision të vështirë përmbysjeje. Sikundër çdo veprimtari madhore sportive, kjo ndeshje u soll për sportdashësit drejtpërdrejt në Rrjetin e Radio-Televizionit Shqiptar. Ndeshja ka nisur më mirë për vendasit dhe në minutën e 7-të, Aguerro godet me kokë, grushton De Hea, shmang një gol të sigurt, ashtu siç bën edhe 30 sekonda më pas me këmbë, teksa Junajtid e ndjen veten “nën rrethim”.
Dueli midis Aguerros dhe De Heas vazhdon edhe 8 minuta më pas, por gardiani spanjoll i portës së “Djajve të kuq” është në lartësinë e duhur, në kuptimin e mirëfilltë të fjalës. Përkundër rrjedhës së lojës, është Mançester Junajtid që gjen rrugën e rrjetës në minutën e 36-të, kur Nemanja Matiç ekzekuton mjeshtërish brenda zone dhe mposht mbrojtjen dhe portierin e Sitit, Bravo.
Siti ka barazuar shifrat 3 minuta para fundit të pjesës së parë, por goli nuk vlen, pasi dy lojtarë të skuadrës vendase kanë qenë në pozicion jashtëloje. Me këtë epërsi minimale të miqve do të mbyllen 45 minutat e para. Pjesa e dytë do të jetë më e hapur dhe më e luftuar nga të dyja skuadrat dhe në minutën e 58-të, Stërling i shmang të gjithë, përfshi edhe De Hean, por në fund nuk gjen dot katërkëndorin e portës mike.
Pavarsisht se autori i golit, Matiç, do të dalë me karton të kuq në minutën e 76-të, dhe Siti do të gjejë një tjetër gol, që sërish do të anulohet, Mançester Junajtid do ta mbrojë fitoren minimale, por do të jetë Mançester Siti që do të shkojë në finalen e madhe të 1 marsit 2020 me Aston Vilën.
