ASNN – Kukësi fitore pa shkëlqim, por me peshë për klasifikimin, Skënderbeu zyrtarisht në krizë. Mjaftoi një 11-metërsh i shndërruar në gol që Kukës të marrë të premten 3 pikë dhe të barazohet me Skënderbeun në vend të dytë, me nga 30 pikë secili. Dueli midis dy skuadrave pretendente pritej me interes për vetë faktin se përplaseshin kampionët me nënkampionët e Shqipërisë.

Fituan nënkampionët, duke dhënë një sinjal që janë futur në garën e titullit me më shumë forcë se zakonisht. Në fakt, asnjëra skuadër nuk dominoi dhe nuk pati futbolli të bukur mjaftueshëm për ta quajtur një ndeshje të madhe. Më shumë se sa meritë e Kukësit, fitorja e verilindorëve erdhi nga një gafë e portierit Teqja të Skënderbeut, që nuk u tregua i vëmendshëm.

Më pas, një 11-metërsh që shndërrohet në gol nga Melo. 1-0 dhe Kukësit i mjafton për të marrë trepikëshin aq të dëshiruar nga trajneri Armando Cungu. Për trajnerin shkodran të skuadrës verilindore, më shumë sesa gëzimi për fitoren ka nevojë të rehabilitojë Rexhinaldon e “dalë duarsh” si pasojë e prishjes së marrëdhënies mes klubit e sulmuesit.

Madje vetë lojtari mozambikas, konfirmoi pas ndeshjes se do të respektonte kontratën dhe në maj do të largohej, duke e vënë Kukësin në siklet. Skënderbeu humbi, ndoshta në mënyrë të pamerituar, por me aq shumë mungesa, pa një ide të qartë në lojë dhe prej disa ndeshjesh në krizë rezultati, doli dhe këtë herë kokëulur, me dilema të mëdha rreth vazhdimësisë.

Kukësi vetëm sa ia shtoi dozën e stresit trajnerit Orges Shehi, i cili pranoi se skuadra e tij nuk duhej kurrsesi të dilte e humbur nga kjo përballje. Në kushtet e reja të renditjes, i fituar me sa duket ka dalë Partizani, i cili do të ketë një shans të thellojë kryesimin e tij, nëse fiton përballë Teutës në duelin e së shtunës në “Niko Dovana”.

Kategoria Superiore

Java e 16-të

Të premten, 7 dhjetor 2018:

Kukësi – Skënderbeu          1-0

Të shtunën, 8 dhjetor 2018:

Tirana – Kastrioti                   (14:00)

Teuta – Partizani                   (17:00)

Të dielën, 9 dhjetor 2018:

Kamza – Luftëtari                 (14:00)

Flamurtari – Laçi                   (17:00)

Renditja

Nr. Skuadra               Pikë

1. Partizani 34
2. Skënderbeu 30
3. Kukësi 30
4. Teuta 28
5. Laçi 26
6. Flamurtari 22
7. Luftëtari 13
8. Tirana 11
9. Kastrioti 10
10. Kamza 9