ASNN – Kukësi dhe Tirana kanë korrur fitore në takimet e javës së parë të Kategorisë Superiore, të luajtura sot. Verilindorët kanë mposhtur Bylisin 2-0, ndërsa Tirana i ka prishur festën Tërbunit në debutimin në nivelin më të lartë të futbollit shqiptar. Java e parë mbyllet me takimin e 9 shtatorit 2015 midis Vllaznisë dhe Skënderbeut.
Ky takim është shtyrë për shkak të impenjimit të korçarëve në “play-off”-in e Ligës së Kampioneve. Kategoria Superiore e Kampionatit Kombëtar të Futbollit ka vijuar të dielën me dy takime të tjera të javës së saj të parë të këtij edicioni të 77-të dhe Kukësi & Tirana kanë marrë fitore në duelet përkatëse ndaj Bylisit dhe Tërbunit, duke marrë kreun e renditjes me pikë të plota.
Verilindorët kanë triumfuar në fushën e tyre ndaj ballshiotëve, me nga një gol të shënuar në fundin e secilës pjesë loje, duke konfirmuar statusin e tyre si pretendentë për të sfiduar Skënderbeun në mbrojtjen e titullit “kampion”. Goli i Kariokës në minutën e 44-t dhe ai i Floresit në minutën e dytë shtesë të ndeshjes i kanë dhënë Kukësit fitoren 2-0 në një ndeshje që, pavarsisht se hyrja ka qenë falas për tifozët, pak e ka tërhequr vëmendjen e sportdashësve vendas.
Ndërkaq, në Pukë, Tërbuni nuk ka arritur ta festojë me një fitore debutimin e tij në nivelin më të lartë të futbollit shqiptar, pasi është mundur 1-2 nga Tirana, në një ndeshje të zhvilluar nën nivelin mesatar. Ndonëse Malindi i ka kaluar pukjanët në epërsi në minutën e 23-të, një gol i Gilman Likës 5 minuta para mbylljes së pjesës së parë dhe një gol tjetër i japonezit Fukui, në minutën e 72-të, u kanë dhënë bardhebluve fitoren dhe 3 pikë e plota, që e bashkojnë Tiranën me Kukësin dhe Teutës në krye pas javës së parë.
Kjo javë ka nisur të premten me barazimi 1-1 midis Partizanit dhe Laçit në kryeqytet, dhe ka vijuar të shtunën me fitoren 1-0 që Teuta arriti ndaj Flamurtarit në Fier. Java e parë mbyllet me takimin e 9 shtatorit 2015 midis Vllaznisë dhe Skënderbeut, që është shtyrë për shkak të impenjimit të korçarëve në “play-off”-in e Ligës së Kampioneve.
