Komiteti Drejtues i Federatës Shqiptare të Basketbollit dje nëpërmjet një vendimi qarkullues ka falur Apoloninë e Nën-16-vjeçarëve apo, thënë ndryshe, paratërinjve, e cila së bashku me Olimpik Basket, për shkak të sherrit masiv që ka ndodhur në ndeshjen e 12 marsit, ishin përjashtuar.
Një vendim i tillë ishte marrë në mbledhjen e 7 prillit 2016 e të paktën edhe sipas vendimit të djeshëm, më 11 prill 2016, Apolonia ka bërë ankimimin e tij. Në të tilla kushte, teksa ky vendim qarkullues ka marrë aprovimin e shumicës së anëtarëve të Komitetit Drejtues, është revokuar pjesërisht vendimi i datës 7 prill 2016.
Ndërsa është vendosur ndryshimi i masës së dënimit për Apoloninë dhe lejimin e saj në kampionatin e paratërinjve, por pasi të ketë shlyer dënimet e mëposhtme: Bazuar në nenin 14.9 të gjithë lojtarët pjesëmarrës në ndeshje konstatohen në shkelje të këtij neni dhe për rrjedhojë dënohen me shumën prej 10.000 lekësh secili.
Lojtarët që janë dënuar me teknik përjashtimi gjobiten edhe me 3,000 lekë gjobë përveç dënimit sipas nenit 14.9. Vendimi nr. 4, datë 7 prill 2016 i Komitetit Drejtues, mbetet në fuqi lidhur me ekipin e Olimpik Basket. Duke qenë se nismëtar të konfliktit kanë qenë veprimet e vetë lojtarëve të Olimpik Basket, të cilat janë bërë shkak për ndërprerjen e ndeshjes, Olimpik Basket-Apolonia përfundon me rezultatin 0-20.
Kësisoj Apolonia do të vijojë kampionatin duke pretenduar që të jetë në fazën finale të “play-off”-it për titull. Tashmë Apolonia ka për të luajtur dy ndeshjet e prapambetura me Ardhmërinë Basket dhe Partizanin, si dhe ndeshjen e kësaj jave me Kamza Basketin.
Kampionati Kombëtar
i Basketbollit – Paratërinj
Grupi B
Renditja e rishikuar
Nr. Skuadra N. F. H. Psh-Pp Pikë
- Kamza Basket 8 7 1 545-345 15
- Ardhmëria Basket 8 5 3 440-382 13
- Apolonia 6 6 0 318-176 12
- Partizani 7 2 5 356-420 9
- Olimpik Basket 6 1 5 229-326 7
- Goga Basket 2 7 0 7 246-470 7
