ASNN – Ballkani, Drenica dhe Drita e Gjilanit ndajnë 3 vendet e para me nga 7 pikë. Niveli më i lartë i Kampionatit të Futbollit të Kosovës, Superliga, ka luajtur të shtunën dhe të dielën ndeshjet e javës së 3-të të saj dhe kreu i renditjes tanimë është ndarë midis 3 skuadrave. Të shtunën, Drita ka mundur Malishevën me një gol të vetëm të shënuar në 5 minutat e fundit të kohës së rregullt, duke u ngjitur në kuotën e 7 pikëve pas 3 javëve të para. 7 pikë ka edhe Drenica e Skënderajt, që mundi të shtunën në shtëpi Prishtinën me shifrat 2-1.

Vazhdon kështu forma e dobët në këtë fillimsezon e kampiones në fuqi, edhe pse kryeqytetasit bënë një paraqitje mjaft të mirë gjatë verës në turet eliminatore të Ligës së Kampioneve dhe Ligës së Konferencës. Ndërkaq, Dritës së Gjilanit dhe Drenicës së Skënderajt i është bashkuar në krye edhe Ballkani, që ka mposhtur 3-2 Ulpianën, po vetëm falë golit të shënuar në minutat shtesë që kanë qenë dramatike. Skuadra nga Suhareka mban vendin e parë, vetëm falë numrit më të madh të golave të shënuar në këto 3 ndeshje.

Kjo sepse Drenica dhe gjilanasit kanë të njëjtin golaverazh, +2, dhe ndajnë vendin e dytë dhe të 3-të. Dy ndeshjet e fundit të javës së 3-të të Superligës së Kosovës janë luajtur të dielën dhe Gjilani është ndarë me rrjeta të paprekura në shtëpi me Dukagjinin, dhe mban vendin e 4-t, me 5 pikë. Kurse Ferronikeli gjeti fitoren e parë këtë sezon, duke fituar 2-0 në fushën e Llapit dhe është ngjitur në vendin e 6-të, me 3 pikë, një më pak sesa Malisheva. Në 4 vendet e fundit të renditjes, Llapi dhe Dukagjini kanë nga dy pikë, kurse Prishtina dhe Ulpiana kanë nga një pikë.

Ndeshjet e javës së 4-t të Superligës së Kosovës luhet në mesjavë dhe të mërkurën spikat dueli i kreut midis Dritës së Gjilanit dhe Ballkanit, kurse të enjten ai midis Prishtinës dhe Gjilanit.

Superliga e Kosovës

Java e 3-të

Të shtunën, 11/09/2021:

Malisheva – Drita                              0-1

Drenica Skënderaj – Prishtina       2-1

Ballkani – Ulpiana                            3-2

Të dielën, 12/09/2021:

Gjilani – Dukagjini                            0-0

Llapi – Feronikeli                              0-2

Nr.       Skuadra                     N.        F.         B.        H.        Gsh-Gp          Pikë

1. Ballkani                     3          2          1          0          6-4                  7
2. Drenica Skënderaj   3          2          1          0          5-3                  7
3. Drita                            3          2          1          0          3-1                  7
4. Gjilani                         3          1          2          0          2-1                  5
5. Malisheva                  3          1          1          1          4-3                  4
6. Feronikeli                  3          1          0          2          3-3                  3
7. Dukagjini                   3          0          2          1          3-4                  2
8. Llapi                           3          0          2          1          1-3                  2
9. Prishtina                    3          0          1          2          2-4                  1
10. Ulpiana 3          0          1          2          4-7                  1

Java e 4-t

Të mërkurën, 15/09/2021:

16:00  Feronikeli – Dukagjini

16:00  Drita – Ballkani

16:00  Llapi – Malisheva

Të enjten, 16/09/2021:

16:00  Prishtina – Gjilani

16:00  Ulpiana – Drenica Skënderaj