ASNN – Presidenti i Paris SG-së, Al-Khelaifi dhe ish-Sekretari i Përgjithshëm i FIFA-s, Zherom Valke janë paditur nga prokuroria e Zvicrës për korrupsion. Ata akuzohen për të marrje ryshfeti për dhënien e të drejtave televizive për transmetimin e ndeshjeve të futbollit të Botërorit. Por të dy, i kanë hedhur poshtë akuzat, madje kërkojnë nisjen e një hetimi për prishjen e imazhit nga mediat. Padinë e kofirmon edhe Zyra e Prokurorit të Përgjithshëm në Zvicër, nëpërmjet një deklarate për shtyp.
Një i dyshuar i tretë, pa emër në këtë rast dhe i përshkruar nga prokurorët zviceranë si “një biznesmen në sektorin e të drejtave të sportit”, është gjithashtu i akuzuar, thuhet në deklaratë. Al-Khelaifi, i cili është edhe shefi i kanalit televiziv të Katarit BeIN Sports, dyshohet se i ka dhënë dhurata të papërshtatshme Valkes, me qëllim të sigurimit të të drejtave të transmetimit për ngjarjet prestigjioze, përfshirë Botërorin. Këto akuza, kreu i i klubit parisien i quajti si të pabazuara.
Ndërkaq, Valke ka qenë dikur ish-krahu i djathtë i Sep Blaterit në FIFA. “Pas një hetimi tre-vjeçar, unë jam i kënaqur që të gjitha akuzat për ryshfet në lidhje me Botërorët 2026 dhe 2030 janë tërhequr”, – tha Al-Khelaifi në një deklaratë, duke këmbëngulur se “akuzat nuk kanë dhe nuk kanë pasur kurrë, ndonjë bazë.” Biznesmeni pa emër ndërkohë u padit për ryshfet pasi pagoi kompaninë e Valkes, “Sportunited LLC”, 1.25 milionë euro gjithsej.
Valke gjithashtu akuzohet për shfrytëzimin e pozitës së tij në FIFA midis vitit 2013 dhe 2015 për të ndikuar në dhënien e të drejtave të mediave për Italinë dhe Greqinë për disa Botërorë dhe turne të tjera të planifikuara ndërmjet 2018-ës dhe 2030-ës, “me qëllim që të favorizojnë partnerët mediatikë që ai preferoi” në këmbim për pagesa nga biznesmeni pa emër. U zbulua gjithashtu se Valkes iu kthye një para-pagese prej rreth 500,000 euro që ai i kishte bërë një pale të 3-të për blerjen e një vile në Sardenjë.
Kjo, pasi Al-Khelaifi e bleu vilën përmes një kompanie në vend të Valkes. Por Al-Khelaifi ndërkohë u ankua se hetimi 3-vjeçar nga Zvicra ishte “karakterizuar nga rrjedhje të vazhdueshme informacioni, keqinformime dhe një axhendë në dukje të pamëshirshme për të shkatërruar reputacionin e tij në media”. “Për këtë arsye, kam kërkuar nga autoritetet përkatëse zvicerane që të nisin një hetim penal për prishjen e imazhit”, – tha ai, duke shtuar se po mendonte të ndërmarrë veprime kundër mediave që “kanë botuar në mënyrë të përsëritur artikuj të pambështetur dhe shumë të dëmshëm”.
