ASNN – Pas rekordit në Ligën e Kombeve, Zeneli i Kosovës lë gjurmë edhe në Holandë. Një tjetër shqiptar spikati këtë javë në Europë. Bëhet fjalë për sulmuesin e përfaqësueses së Kosovës, Arbër Zenelin, i cili realizoi gol në fitoren 3-1 të skuadrës së tij Herenven në ligën e parë holandeze përballë Fortuna Sitardit.
Zeneli realizoi me penallti në minutën e 47-të, duke ndihmuar ekipin e tij të merrte një trepikësh me vlerë për renditjen. Në fakt, ishte një gol nga pika e bardhë e 11-metërshit, por që për Zenelin merr vlerë, sepse është në vazhdën e një paraqitje mjaft të mirë që ka bërë javët e fundit.
E sidomos me skuadrën e përfaqësueses së Kosovës, të drejtuar nga trajneri zviceran Bernard Shalondë. Në fakt, kulmin e vet Zeneli e pati në ndeshjen e fundit në grupin e tretë të Ligës D, të Ligës së Kombeve, ku në fitoren 4-0 ndaj Azerbajxhanit realizoi një tregolësh me mjaft peshë.
Madje në këtë Ligën e Kombeve ai llogaritet edhe si lojtari i tretë me shpejtësinë më të madhe në këtë aktivitet, pas Kilian Mbapesë së Francës dhe Lëroi Sanesë së Gjermanisë. 23-vjecari po kërkohet nga shumë klube evropiane dhe sidomos javët e fundit ka qenë në qendër të vëmendjes së shumë mediave sportive në Holandë dhe në Zvicër.
