AlbanianSport.com 31.12.2016 14:25
ASNN – Në fakt, që nga paslufta e fundit në Kosovë shumë futbollistë të njohur, të zhvilluar në klubet kosovare, kishin shkuar në skuadrat e Shqipërisë prej të cilave ishin transferuar nëpër klube evropiane. Dhe, nga të gjitha ato transferime përfitonin vetëm klubet shqiptare, të cilat konsideroheshin klube “amë” të tyre, pasi Kosova nuk ishte në UEFA e FIFA.
Në këtë mënyrë, klubet e Kosovës nuk e shijonin asnjë cent. Por, në organizmin që qeveris futbollin e Kosovës, thonë se me pranimin e saj në UEFA e FIFA gjërat kanë ndryshuar. Klubet e Shqipërisë më nuk do të mund t’ua “hanë hakun” klubeve kosovare. “Ne tanimë jemi anëtarë të UEFA-s dhe të FIFA-s dhe rregulli vlen për të gjithë”, – thonë në zyrat e FFK-së.
“Klubet e Kosovës do ta marrin shumën që u takon prej çdo transferimi të futbollistëve që i kanë zhvilluar, – vijojnë burimet në fjalë. – Klubet nuk kanë nevojë më të shqetësohen sepse automatikisht do ta marrin shumën që u takon prej transferimeve. Kjo është e rregulluar dhe e kontrolluar nga vetë FIFA, e cila, në këtë drejtim, nuk lejon lëshime.”
Duhet theksuar se Milot Rashica është bërë një futbollist i kërkuar në Evropë vetëm pas një viti të kaluar në Vitese të Holandës, ku kishte shkuar nga Vushtria. Mirëpo, shkolla e futbollit “Kurda” ka angazhuar avokatë për të marrë atë që i takon prej çdo transferimi të mesfushorit, të cilin e kishte zbuluar.