ASNN – Nga rreth 400 mijë nxënës të shkollave fillore dhe të mesme, rreth 35 mijë prej tyre vitin e kaluar kanë qenë aktivë në garat e nivelit shkollor komunal dhe regjional të organizuara nga Federata e Sportit Shkollor e Republikës së Kosovës (FSSHRK). Sipas asaj që shkruan në një raport të posaçëm e përditshmja e mirënjohur kosovare, “Koha Ditore”, pjesëmarrja e shkollarëve ka shënuar rritje me vitet e mëparshme, që ishte një prej misioneve të kësaj federate.

Kjo federatë, që është e thirrur për të organizuar, seleksionuar dhe zbuluar talentet e shkollarëve, nuk ia ka dalë edhe me këtë të fundit. Zyrtarë të Federatës tregojnë se në garat që kanë organizuar nëpër Kosovë nuk kanë rënë në sy talente të mëdha që më pas do t’i orientonin në klubet përkatëse të komunave për t’u zhvilluar si sportistë. E gara janë organizuar në sportet më të njohura në Kosovë, si hendbolli, basketbolli, volejbolli, futsalli, pingpongu e shahu.

“Ne angazhohemi që t’u mundësojmë nxënësve aktivitetet sportive nëpërmjet garave të ndryshme”, – ka thënë Sekretari i FSSHRK-së, Jeton Nebiu, i cituar nga përditshmja kosovare në fjalë. – Jemi federata e vetme që kemi diku mbi 400 mijë fëmijë të përfshirë në nivel të mesëm e të ulët. Vitin e kaluar kanë pjesë marrë rreth 35 mijë fëmijë. Ne nuk mund të themi se jemi të kënaqur. Niveli nuk është i kënaqshëm, por kemi shumë punë për të bërë.”

Sipas Nebiut, për sivjet shpresohet të rritet numri i pjesëmarrësve në 50 mijë, por edhe të zbulohet ndonjë talent i ndonjë sporti.