ASNN – Është mbajtur këtë të hënë në Prishtinë, ceremonia e ndarjes së shpërblimeve shtetërore për xhudistet, të cilat i sollën Kosovës një medalje të artë dhe një të bronztë nga Kampionati Evropian i Xhudos për Të Rritur në Rusi. Në bazë të rregullores së Ministrisë së Kulturës për sportistët me arritje të mëdha, fituesja e medaljes së artë, Majlinda Kelmendi u shpërblye me 20 mijë euro, Nora Gjakova me 8 mijë euro për medaljen e bronzit, ndërsa trajneri i tyre, Driton Kuka, me gjysmën e shumës së fitueseve, pra 14 mijë euro.
Këtë vit, shpërblimin e dorëzoi, për herë të parë, kryeministri Isa Mustafa, ndërsa pas ceremonisë Majlinda Kelmendi, duke folur për “Top Channel” tha se institucionet duhet të investojnë më shumë në sport. “Nuk thuhet kot që sporti është ambasadori më i mirë, – ka deklaruar kampionia e sapokonfirmuar e kontinentit, duke folur për median në fjalë. – Shqiptarët kanë në përgjithësi prirje për sport dhe nuk është investim i keq. Kjo do të thotë se nuk është investim i kotë nëse investohet në sport. Unë jam dëshmia më e mirë, që rinia në Kosovë është e shëndoshë dhe mund të arrijë në majat botërore.”
Pritjen madhështore të kësaj radhe, Kelmendi ia dedikon faktit se triumfi i saj nuk ishte vetëm sportiv, por edhe një fitore diplomatike. “Unë kam qenë edhe më herët kampione e Evropës dhe kampione e botës, mirëpo arsyeja kryesore pse ky rezultat ka bërë bujë kaq të madhe në Kosovë, është fakti se është mbajtur në Rusi dhe për herë të parë, jo vetëm në aspektin sportiv por ndoshta edhe diplomatik, është dëgjuar himni i Kosovës në Rusi, teksa i pranishëm atje ka qenë edhe flamuri kosovar”, – tha në vijim xhudistja pejane.
Para sfidës së radhës në Lojërat Olimpike të Rio De Janeiros, Majlinda Kelmendi beson se, pavarësisht kushteve, rinia e Kosovës mund të garojë me më të mirët.
