ASNN – Përfaqësuesja e Nën-21-vjeçarëve të Kosovës në futboll e mbylli pa asnjë fitore Turneun Ndërkombëtar “Antalia Cup” të zhvilluar në Turqi. Por kjo nuk e shqetëson trajnerin e përfaqësueses së kësaj grupmoshe, Rafet Prekazi, që fitore e vlerëson vetë pjesëmarrjen në këtë ngjarje ndërkombëtare.
Ndërsa mendimi i trajnerit të përfaqësueses së të rriturve të Kosovës, Albert Bunjaku, është pak më e ndryshme. Ai i ka ndjekur nga afër paraqitjet e lojtarëve të moshës deri 21 vjeç dhe thotë se përfaqësueses së kësaj grupmoshe i duhet ende shumë punë për të bërë.
“Me këtë turne kemi fituar të gjithë e në veçanti lojtarët e përfaqësueses duke e pasur parasysh se kanë pasur përballë kundërshtarë të fortë, – ka thënë Prekazi për të përditshmen e mirënjohur kosovare, “Koha Ditore”. – Mendoj se duhet që ndeshje të tilla të përsëriten më shumë për lojtarët e përfaqësueses.”
“Kanë fituar përvojë ndërkombëtare, – ka vijuar ai. – Kanë dhënë maksimumin që të gjithë dhe kanë pasur një paraqitje dinjitoze.” Ndeshjen e parë të këtij turneu, Kosova e zhvilloi kundër përfaqësueses së Bahreinit, duke barazuar me rrjeta të paprekura, ndërsa të dytën e humbi 0-2 me Ukrainën.
Në ndeshjen e tretë, Kosova barazoi sërish me rrjeta të paprekura me Arabinë Saudite, ndërsa me rezultat të barabartë, por me shifrat 1-1 u nda edhe me Shqipërinë në ndeshjen e katërt, kurse në ndeshjen e fundit kundër Nën-19-vjeçarëve të Iranit, të shtunën, Kosova pësoi një disfatë me rezultatin 0-2.
