ASNN – Rinovimi i shumëpritur i stadiumit të kryeqytetit të Prishtinës, Kosovës, do të nisë shumë shpejt. Sipas asaj që raportojnë mediat kosovare, Ministri i Sportit, Kujtim Shala, konfirmoi investimin e 500 mijë eurove në këtë stadium, ku është mirëpritur nga drejtuesit e FC Prishtinës, klub ky që e shfrytëzon këtë arenë sportive. Vizita e Shalës bërë stadiumit bëri që te bardhekaltrit të rikthehet shpresa se do të vijnë ditë më të mira për futbollin.
Ministria e Sportit e ka hapur kuletën dhe është shprehur e gatshme të investojë në stadiumin e kryeqytetit. Ministri, Kujtim Shala, ia ka bërë një vizitë, të enjten, stadiumit që e shfrytëzon klubi më i madh në Kosovë, duke i vizituar një nga një dhomat, zyrat dhe fushën. Ndër të tjera, ai ka premtuar se institucioni të cilin e drejton, do t’i investojë 500 mijë euro këtë vit, në rinovimin e stadiumit. Por, Shala ka kërkuar nga drejtuesit e klubit bardhekaltër që të bisedojnë me krerët e Komunës së Prishtinës.
Sipas tij, të dyja palët, klub dhe komunë, duhet të mundohen ta përgatisin bashkërisht projektin e investimeve deri në muajin mars, për t’i nisur atëherë punimet. “Jam takuar me Shpendin (Ahmetin), me të cilin kam biseduar për stadiumin kombëtar dhe për atë të Prishtinës, – ka thënë Shala, gjatë vizitës që bëri në stadium, ku u prit nga krerët e klubit kryeqytetas. – Ne jemi të gatshëm t’i investojmë 500 mijë euro për këtë stadium. Do ta shohim se ku ka nevojë më shumë të investohet.”
“Ju duhet të bisedoni me drejtuesit e Komunës dhe ta përgatisni projektin deri kah muaji mars dhe më pas mund t’ia nisim punës”, – ka shtuar Ministri. Gjithashtu, ai ka premtuar se në muajin qershor do të rishqyrtohet buxheti dhe se ka mundësi që kjo shifër të rritet, ndërsa është zotuar se edhe vitin tjetër do të ketë investime në këtë stadium. Drejtuesit e FC Prishtinës e kanë mirëpritur ngrohtësisht ministrin Kujtim Shala. Vizitën e tij, bardhekaltrit e konsideruan të veçantë dhe shumë shpresëdhënëse, pasi ndiheshin të lënë pas dore.
