ASNN – Tanimë duket se është bërë një çështje që luftën e fitojnë ata që qëndrojnë deri në fund në fushën e betejës. E teksa basketbolli tashmë e ka anuluar sezonin 2019-2020, për shkak të përhapjes së epidemisë së koronavirusit, tri sporte të tjera kolektive të mëdha në Kosovë nuk po e mendojnë një gjë të tillë. Sipas asaj që raportojnë mediat e Prishtinës, futbolli, hendbolli dhe volejbolli po synojnë vazhdimin e veprimtarive, që janë pezulluar që nga data 13 mars, me vendimin e Qeverisë së Kosovës.
Muajin e shkuar, Federata e Basketbollit të Kosovës (FBK), mori vendimin për të anuluar edicionin aktual në Superligën e meshkujve dhe të femrave, duke mos shpallur as “kampionet” përkatëse. Por, ndryshe nga FBK-ja, Federata e Futbollit të Kosovës (FFK), Federata e Hendbollit të Kosovës (FHK) dhe Federata e Volejbollit të Kosovës (FVK) janë të vendosura për të vazhduar dhe për ta përmbyllur edicionin e pezulluar në mesin e muajit mars.
FFK-ja ka përpiluar një plan për rifillimin e kampionatit, kurse edhe FHK-ja dhe FVK-ja kanë bërë të ditur se ditët në vijim do të dalin me planet dhe sistemin për rinisjen e garave. Prej këtij muaji, masat e bllokimit pritet të lirohen, pasi Ministria e Shëndetësisë së Kosovës e konfirmoi një gjë të tillë. MSH-ja të enjten njoftoi se “hapja selektive e veprimtari sportive” është në fazën e tretë, që fillon më datën 1 qershor”.
Përderisa MSH-ja nuk parashikon veprimtari sportive këtë muaj, një gjë e tillë nuk mund të thuhet edhe për Federatën e Futbollit të Kosovës (FFK). Synimi i FFK-së është që këtë muaj të rifillojë me garat tashmë të pezulluara. Më 23 e 24 maj synohet të zhvillohen ndeshjet gjysmëfinale të Kupës së Kosovës, kurse më 30 maj të nisin ndeshjet e kampionatit.
Madje FFK-ja ka thënë se të gjitha ndeshjet do të luhen pa shikues dhe nën masa të rrepta sigurie. Të enjten është mbajtur mbledhja e Komiteti Ekzekutiv të FFK-së, që unanimisht ka vendosur për rifillimin e kampionatit, duke përpiluar një pasqyrë të kalendarit të ndeshjeve të mbetura. Sipas njoftimit të FFK-së, kalendari është në koordinim të plotë me kërkesën e UEFA-s për përfundim të edicionit deri më 20 korrik.
