ASNN – Sipas asaj që raportojnë mediat vendase, Loret Sadiku është zgjedhur futbollisti i vitit në Kosovë. Llamkos Kosova u shpall ekipi më i mirë, kurse Ismet Munishi ishte trajneri i vitit 2014. Besfort Kosumit i takoi çmimi i gjyqtarit më të mirë, ndërsa FFK e zgjodhi edhe 11-shin e vitit që shkoi
Federata e Futbollit të Kosovës (FFK) i ka zgjedhur të premten më të mirët e vitit 2014 në futbollin kosovar, në manifestimin e mbajtur në “Hotel Emerald”. Loret Sadiku është zgjedhur futbollisti më i mirë i vitit, pasi shkëlqeu në nivelin e klubeve, por edhe në fanellën e përfaqësueses së Kosovës.
Qendërmbrojtësi kosovar nuk ishte i pranishëm, për shkak të angazhimeve me klubin, por deklaratat e tij nuk munguan assesi. “Më vjen keq që nuk jam aty, por kam angazhime me klubin dhe s’mund të vija, – ka thënë Sadiku përmes ekranit televiziv. – Ky çmim është një privilegj për mua.”
“Kosova ka shkuar larg, – ka vijuar ai. – Do të luajmë në Kampionat Botëror një ditë.” Gjithashtu, organizmi që qeveris futbollin kosovar zgjodhi edhe më të mirët në të gjitha kategoritë. Llamkos Kosova u zgjodh ekipi më i mirë i vitit 2014, pasi e fitoi titullin “kampion”.
Po kështu, Ismet Munishi ishte trajneri më i mirë, pasi e ndihmoi skuadrën vushtrriase ta fitojë titullin historik. Besfort Kosumi ishte gjyqtari i vitit, pasi bëri më pak gabime në ndeshjet ku gjykoi. Në futbollin e sallës, ekipi më i mirë u zgjodh Besa nga Peja, kurse golashënuesi më i mirë ishte Mentor Mejzini.
Lojtari më i mirë në këtë disiplinë të futbollit u zgjodh Jeton Rukovci. Në futbollin e madh, golashënuesi më i mirë ishte Blerand Kurtishaj, ndërsa lojtari më perspektivë u zgjodh Bersant Celina. Çmimi i lojtarit më të mirë të ri i takoi Ron Brojës, kurse klubi më “Fair-Play” i vitit ishte Drita e Gjilanit.
Ndërkohë, u zbulua edhe ekipi i vitit në “Raiffeisen” Superligën e Kosovës, që përbëhej nga: Petrit Tahiri, Ilir Izmaku, Fidan Gërbeshi, Arbër Prekazi, Viktor Kuka, Dukagjin Gashi, Kreshnik Lushtaku, Bashkim Shala, Labinot Osmani, Driton Krasniqi e Blerand Kurtishaj.
Përpos që pati katër përfaqësues në ekipin e vitit (Shala e Osmani janë transferuar së fundmi), FC Prishtina mori edhe shpërblime tjera. Skuadra më e mirë e femrave u zgjodh pikërisht Prishtina, ndërsa futbollistja më e mirë e vitit, Qëndresa Krasniqi, gjithashtu nga ky klub. Ndër të tjera, mirënjohje iu dha Ismet Begollit, që u zgjodh “punëtori sportiv i vitit”.
Kurse, punëtorë sportiv të diasporës ishin Fehmi Kongjeli e Jeton Morina. Mirënjohje post-mortum u ndanë për Besim Dobroshin, Ismajl Jusufin, Ruzhdi Ramosajn, Triumf Shabanin e Kursent Ramadanin
