ASNN – Viti 2016 është mjaft i rëndësishëm për Kosovën sa i përket ndërkombëtarizimit të sportit të saj, pasi gjatë këtij viti pritet të konkretizohet në fillim të majit pranimi i shumëpritur në UEFA dhe FIFA. Në të njëjtën kohë, pas pjesëmarrjes në Lojërat Olimpike Evropiane, që u mbajtën në 2015-ën në Baku, pjesëmarrja në Olimpiadën e Brazilit është padyshim vula e ndërkombëtarizimit të sportit kosovar.
Pranimi i shumëpritur në UEFA dhe FIFA, që pritet të konkretizohet në fillim të majit dhe Lojërat Olimpike të verës, që do të mbahen në Brazil, do të jenë dy etapat madhore që do të përmbyllin edhe procesin e ndërkombëtarizimit të plotë të sportit të Kosovës. Këto janë edhe dy pengesat e fundit drejt njohjes së plotë të Kosovës si një shtet edhe në sport.
Kosova pritet të pranohet në UEFA më 3 maj, në Kongresin e kësaj të fundit, duke e kompletuar kështu ndërkombëtarizimin e futbollit kosovar, që ende shpreson të debutojë zyrtarisht në garat ndërkombëtare që në Eliminatoret e Botërorit 2018, që do të mbahet në Rusi. Ndërkohë, ajo që ka qenë padyshim “lokomotiva” e sportit kosovar, xhudistja Majlinda Kelmendi, është favorite që ta kurorëzojë debutimin e Kosovës në Olimpiadën “Rio 2016” me një medalje olimpike.
Natyrisht, një rol të rëndësishëm në ndërkombëtarizimin e sportit ka luajtur edhe lobimi i faktorit politik, vendas dhe ndërkombëtar. Pas pjesëmarrjes në Lojërat Olimpike Evropiane, që u mbajtën në 2015-ën në Baku, pjesëmarrja në Olimpiadën e Brazilit është padyshim vula e ndërkombëtarizimit të sportit kosovar.