Pas Sekretarit të Përgjithshëm, Leart Hoxha, një tjetër largim ka ndodhur dje nga Federata e Basketbollit të Kosovës. Arben Fondaj, anëtar i Bordit të FBK-së, ka njoftuar se nuk do të jetë më në këtë pozicion për arsye personale. “Ishte eksperiencë fantastike dhe privilegj, njëkohësisht, deri me tani, – ka shkruar ai në një postim në profilin e tij në rrjetin social “Facebook”.
“Për shkaqe të detyrimeve familjare, kam ndërprerë angazhimin tim si anëtar bordi i FBK-së, – ka vijuar Fondaj. – Falënderoj përzemërsisht kryetarin dhe të gjithë anëtarët tjerë për besimin e dhënë në dy mandate.” Ajo që duhet theksuar është fakti se Kosova në pjesëmarrjen e saj të parë në Eliminatoret e Kampionatit Evropian 2017 i ka humbur të 6-të ndeshjet e saj.
Fillimisht 68-113 me Slloveninë, pastaj me Ukrainën 63-70 dhe Bullgarinë 84-105. Në ndeshjet e kthimit, është mundur nga Sllovenia 81-91, nga Ukrainë 61-100 dhe nga Bullgarinë 62-67. Të gjitha ndeshjet i ka luajtur në Mitrovicë si pritëse dhe ironia më e madhe ka qenë ndeshja në Vilnius me Ukrainën, shtet që nuk e njeh pavarësinë e Kosovës dhe nuk pranon të luajë me të në shtëpi.
Përkundër kësaj e gjithë paraqitja e kombëtares së Kosovës në këto Eleminatore, që duket në të kundërt të asaj çka prodhojnë klubet me shumë të huaj në arenën ndërkombëtare, lë shumë për të dëshiruar. Ndaj dhe duket se kanë ardhur dorëheqjet radhazi nga organet drejtuese të Federatës së Basketbollit të Kosovës, ndërsa pritet të shihet se ç’do të ndodhë në ditët në vijim.
